ललिता निवास प्रकरण : ढकाललाई पुर्पक्षका लागि थुनामा पठाउन आदेश

काठमाडौँ : विशेष अदालतले ललिता निवासको सरकारी जग्गा व्यक्तिको नाममा नामसारी गरेको घटनाका अभियुक्त शोभाकान्त ढकाललाई पुर्पक्षका लागि थुनामा पठाएको छ । 

बुधबार अदालतमा हाजिर हुन आएका ढकाललाई न्यायाधीशहरू अब्दुल अजिज मुसलमान, बालेन्द्र रुपाखेती र चन्द्रबहादुर सारूको संयुक्त इजलासले पुर्पक्षका लागि थुनामा पठाउन आदेश दिएको अदालतका उपरजिष्ट्रार एवं प्रवक्ता पुष्पराज पाण्डेयले जानकारी दिए । 

---

‘ललिता निवासको सरकारी जग्गा व्यक्तिको नाममा नामसारी गरेको अभियोग लागेका शोभाकान्त ढकाल आज हाजिर हुन आउनु भएको थियो । उहाँलाई तीन माननीय न्यायाधीशहरूको संयुक्त इजलासले पुर्पक्षका लागि थुनामा पठाउने निर्णय गरेको छ,’ प्रवक्ता पाण्डेयले इकागजसँग भने । 

बालुवाटारस्थित ललिता निवासको ११३ रोपनी सरकारी जग्गा व्यक्तिको बनाई भ्रष्टाचार गरेको आरोप लागेका मध्य ढकाल एक हुन् । 

अख्तियार दुरुपयोग अनुसन्धान आयोगले ढकालविरूद्ध ३९ करोड २८ लाख बिगो मागदाबीसहित विशेष अदालतमा मुद्दा दायर गरेको थियो ।

यसअघि अदालतले अख्तियार दुरुपयोग अनुसन्धान आयोगका पूर्वप्रमुख आयुक्त दीप बस्न्यात र डिल्लीबजार मालपोत कार्यालयका तत्कालीन अधिकृत कृष्ण पौडेललाई पुर्पक्षका लागि थुनामा पठाउने निर्णय गरेको थियो । पुर्पक्षका लागि थुनामा पठाइएका पौडेल दुई लाख धरौटीमा सर्वोच्चबाट छुटेको प्रवक्ता पाण्डेयले जानकारी दिए । बस्न्यात भने अहिलेसम्म थुनामै छन् । 

अझै ललिता निवासका आरोपितमध्य एक सय ७५ जना अदालतमा हाजिर हुन बाँकी रहेको र एक सय २० जनाभन्दा बढी हाजिर भइसकेको पाण्डेयले जानकारी दिए । ती मध्य पुर्पक्षका लागि बस्न्यात, पौडेल र ढकाललाई मात्रै पुर्पक्षका लागि थुनामा पठाएको हो । अरुलाई धरौटी लिएर छोडेको छ । 

ललिता निवास जग्गा प्रकरणमै ढकालकी पत्नी उमाकुमारी विशेष अदालतबाट धरौटीमा रिहा भइसकेकी छन् ।