रामेछापमा जिप दुर्घटना हुँदा ११ घाइते, वडा सदस्यसहित ३ को अवस्था गम्भीर

रामेछाप — रामेछापमा जिप दुर्घटना हुँदा ११ यात्रु घाइते भएका छन् । रामेछापको उमाकुण्डमा जिप दुर्घटना भएको हो ।

प्रहरीकाअनुसार लिखु तामाकोसी गाउँपालिका १ दुरागाउँबाट उमाकुण्ड ७ भुजीतर्फ जाँदै गरेको बा ११ च ७५९२ नम्बरको बलेरो जिप दुर्घटनामा परेको हो । जिप अनियन्त्रित भई सडकबाट करिब ६० मिटर तल खसेको थियो ।

---

दुर्घटनामा ३ गम्भीर घाइते छन् । उनीहरुलाई थप उपचारका लागि हेलिकोप्टरबाट काठमाडौं ल्याइएको छ । प्रहरीकाअनुसार गम्भीर घाइते हुनेमा लिखु तामाकोसी १ का वडा सदस्य विमल सुनुवार, दुरागाउँकै विमला सुनुवार र राजकुमार थापा रहेका छन् । विमल लिखु तामाकोसी १ का वडा सदस्य हुन् । 

अन्य ४ घाइतेलाई गाडीमार्फत काठमाडौं ल्याइएको छ भने अर्का ४ घाइतेको स्थानीय स्वास्थ्य चौकीमा उपचार भइरहेको छ ।