मकवानपुरमा ट्र्याक्टर दुर्घटना हुँदा तीन जनाको मृत्यु

मकवानपुर - मकवानपुरमा भएको ट्र्याक्टर दुर्घटनामा तीन जनाको ज्यान गएको छ । मनहरी गाउँपालिका ३ कालिदमार भित्री सडकबाट मिलडांडातर्फ जाँदै गरेको ट्र्याक्टर गएराति दुर्घटना हुँदा ३ जनाको मृत्युु भएको हो ।

जिल्ला प्रहरी कार्यालय मकवानपुरका अनुसार मधेश प्रदेश ०३-००१ त ७१८८ नं. को ट्र्याक्टर आफै अनियन्त्रित भई सडकमा पल्टिदा दुर्घटना भएको थियो । ट्र्याक्टरमा सवार ५ जनामध्य ३ जनाको ज्यान गएको हो ।

---

२ जना घाइते छन् । घाइते भएका अन्दाजी २४ वर्षीय राजकुमार प्रजालाई चुरेहिल अस्पतालमा उपचारको लागि ल्याइएकोमा डाक्टरले मृत घोषणा गरेको थियो । यस्तै हेटौंडा अस्पतालमा उपचारको क्रममा मनहरी ३ हाँडिखोला बस्ने अन्दाजी ३० वर्षको बिरमान रुम्बालाई डाक्टरले मृत घोषणा गरेको मकवानपुर प्रहरीले जनाएको छ ।

यस्तै सालघारी बस्ने अन्दाजी २० वर्षको प्रबिण प्रजा उपचारको क्रममा हेटौंडा अस्पतालमा मृत्यु भएको जिल्ला प्रहरी कार्यालय मकवानपुरले जनाएको छ । यसैगरी दुर्घटनामा घाइते भएका मनहरी हांडिखोलाका अमृत प्रजा चुरेहिल अस्पतालमा उपचारत छन् ।

उनको अवस्था मध्यम रहेको बताइएको छ । यसैगरी अर्का घाइते ठेगाना नखुलेका अन्दाजी ४५ उमेरको जोखलाल प्रजाको शरीरका विभिन्न भागमा चोट लागेकोमा चुरेहिल अस्पतालमा उपचार भइरहेको प्रहरीले जनाएको छ ।