चाडपर्वमा झन् धेरै दुर्घटना : १५ दिनमा ७६ दुर्घटना, २६ जनाको मृत्यु

बुटवल - बडादसैँको घटस्थापनादेखि कोजाग्रत पूर्णिमासम्म १५ दिनको अवधिमा लुम्बिनी प्रदेशमा सडक दुर्घटनामा परी २६ जनाको मृत्यु भएको छ । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार दसैँको अवधिमा ७६ वटा सवारी साधन दुर्घटनामा परेका छन् ।

लुम्बिनी प्रदेशका रोल्पा र पूर्वी रुकुमबाहेक १० वटै जिल्लामा सवारी दुर्घटना भएका छन् । कपिलवस्तु १२ र प्युठानमा तीनवटा सवारी दुर्घटना भएपनि मानवीय क्षति भने भएको थिएन ।

---

प्रहरीका अनुसार सडक दुर्घटनामा परी सबैभन्दा धेरै पाल्पामा ७ जनाको मृत्यु भएको छ। पाल्पामा ५ वटा सवारी साधन दुर्घटनामा परेका थिए। अन्य जिल्लाको तुलनामा दुर्घटनामा पर्ने सवारी साधनको संख्या थोरै भएपनि एउटै दुर्घटनामा एकै परिवारका ६ जनाको मृत्यु भएपछि पाल्पामा मृतकहरुको संख्या बढि देखिएको हो ।

कात्तिक ५ गते महाअष्टमीको दिन पाल्पाको रानीमहल गएर फर्किँदै गर्दा रानीमहलदेखि डेढ किलोमिटर नजिकै बैकुण्ठभिरमा पूर्वी नवलपरासीको देवचुली नगरपालिका वडा नम्बर १६ रजहरका ६५ वर्षीय कृष्ण बहादुर लोहनीको परिवार दुर्घटनामा परेको थियो ।

बागमती प्रदेश ०१-०२६ च ७२०९ नम्बरको जिपमा सवार रहेका कृष्ण बहादुरसँगै उनकी श्रीमती ५५ वर्षीया पार्वती लोहनी, बुहारी ३५ वर्षीया सविना धिताल, नातिहरु ११ वर्षीय सोबिस लोहनी, साढे दुई वर्षका ईशव लोहनी र उनकी सम्धिनी ५५ वर्षीया चुना धितालको घटनास्थलमै मृत्यु भएको थियो ।

जिप चलाइरहेका कृष्णबहादुरका छोरा ३६ वर्षीय ईश्वरबहादुर लोहनी भने दुर्घटनामा परि गम्भीर घाइते छन् । त्यस्तै गत शनिबार बडादसैँको अन्तिम दिन दसैँ मनाएर स्याङ्जादेखि बुटवलतर्फ आउँदै गरेका स्याङ्जा वालिङ नगरपालिका ५ का ४१ वर्षीय मोहनीलाल थापाको पनि मोटरसाइकल दुर्घटनामा परी मृत्यु भएको छ । पाल्पामा दुर्घटनामा परी ५ जना घाइते भए ।

यस्तै सवारी दुर्घटनामा परी रुपन्देही, नवलपरासी र दाङमा चार जनाको मृत्यु भएको छ । रुपन्देहीमा सबैभन्दा धेरै १५ वटा सवारी दुर्घटना हुँदा १३ जना गम्भीर घाइते भएका थिए । नवलपरासीमा ७ वटा सवारीसाधन दुर्घटना हुँदा ६ जना गम्भीर घाइते भए भने दाङमा १० वटा सवारी साधन दुर्घटना हुँदा १३ जना घाइते भएका थिए ।

प्रहरीका अनुसार कपिलवस्तुमा १२ वटा सवारी दुर्घटनामा १० जना गम्भीर घाइते भए । कपिलवस्तुमा दशैंको अवधिमा सवारी दुर्घटनामा परी मृत्यु हुनेको संख्या शुन्य छ । त्यस्तै बर्दियामा ७ वटा सवारी साधन दुर्घटना हुँदा ३ जनाको मृत्यु भयो भने ५ जना गम्भीर घाइते भए ।

बाँकेमा १२ वटा सवारी दुर्घटनामा परी २ जनाको मृत्यु भएको छ भने १० जना गम्भीर घाइते छन् । त्यस्तै अर्घाखाँचीमा ४ वटा सवारी दुर्घटनामा १ जनाको मृत्यु भएको छ भने गुल्मीमा एउटा सवारी दुर्घटनामा एकजनाको मृत्यु भएको प्रहरीले जनाएको छ ।

प्रहरीका अनुसार प्यूठानमा ३ वटा सवारी दुर्घटना हुँदा तीनजना गम्भीर घाइते भएका छन् भने मृतकको संख्या शून्य छ । यो अवधिमा रोल्पा र पूर्वी रुकुममा भने कुनै पनि सवारी दुर्घटनामा नपरेको प्रहरीले जनाएको छ । प्रहरीका अनुसार लुम्बिनी प्रदेशका सातवटा जिल्लामा सवारी दुर्घटना परी ३४ जना सामान्य घाइते भएका थिए ।

दसैँ तिहार जस्ता चाडपर्वको समयमा सडकमा सवारीसाधन र यात्रुहरुको आवत/जावत बढि हुने हुर्दा दुर्घटनाको जोखिम पनि धेरै हुने सुरक्षित यात्रा नेपालका अध्यक्ष कृष्ण बेल्वासे बताउँछन् । प्रहरीको तथ्यांकलाई हेर्दा अन्य समयभन्दा चाडपर्वहरुमा सडक दुर्घटनाको संख्या र मृत्यु दर पनि बढि हुने गरेको छ ।

राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख कृष्ण प्रसाईका अनुसार चाडपर्व लक्षित चेकजाँच लगायत दुर्घटना न्यूनीकरणका उपाय बढि भएपनि दुर्घटना रोकिएको छैन ।

लुम्बिनी प्रदेशमा अन्य प्रदेशमा भन्दा सवारी दुर्घटनाका घटना धेरै हुने गर्छन् । पछिल्ला तीनवटा आर्थिक वर्षमा लुम्बिनीका १२ वटा जिल्लामा भएका सवारी दुर्घटनामा परी एकहजार ५ सय ३६ जनाको मृत्यु भएको छ । यो अवधिमा तीन हजार २ सय ६७ सवारी दुर्घटना भएका थिए । दुर्घटनामा परी ३ हजार ५ जना गम्भीर घाइते भएका थिए। आर्थिक वर्ष ०७७र ७८ मा एकहजार २सय ११ सवारी दुर्घटनामा हुँदा ५ सय २३ जनाको मृत्यु भएको थियो । त्यस्तै, आर्थिक वर्ष ०७८ र ७९ मा एकहजार १सय ६४ वटा सवारी दुर्घटनामा परी ५सय ५१ जनाको मृत्यु भएको थियो भने गत आर्थिक वर्ष ०७९ र ८० मा ८सय ९२ सवारी दुर्घटना हुँदा ४ सय ६२ जनाको मृत्यु भएको थियो ।