सुनसरीमा बन्दुकधारीले पाँच लाख बढी लुटे

मोरङ - सुनसरीमा बन्दुक पड्काउँदै पाँच लाखभन्दा बढी रूपैयाँ लुटपाट भएको छ। बुधबार दिउँसो करिब सवा २ बजे हरिनगरा गाउँपालिका र ईनरूवा नगरपालिकाको सीमामा पर्ने नहर क्षेत्रमा बन्दुक पड्काएर लुटपाट भएको विराटनगरस्थित कोशी प्रदेश प्रहरी कार्यालय विराटनगरका प्रवक्ता प्रहरी उपरीक्षक दीपक पोखरेलले बताए।

उनका अनुसार हरिनगरा गाउँपालिका–२ का ३० वर्षीय आशिफ अन्सारीको साथमा रहेको ५ लाख ३५ हजार रूपैयाँ नगद लुटिएको हो। घटनास्थल पुगेको प्रहरीले लुटपाटमा संलग्न भएका ब्यक्त्तिकाे खोजी सुरू गरेको छ।

---

प्रहरीका अनुसार लुटिएका अन्सारी जग्गा बिक्री गरेको रकम बोकेर मालपोत कार्यालयबाट मोटरसाइकलमा घर जाँदै थिए। एकान्त क्षेत्रमा एकाएक बन्दुक पड्किएकाे आवाज सुनेपछि अन्सारीले मोटरसाइकल रोकेका थिए।

सोही क्रममा उनलाई लुटिएकाे थियाे । अन्सारी सकुशल रहेको जनाउँदै प्रहरीले पैसाको झोला लुटेर तीन जना फरार भएको जनाएको छ। हाल प्रहरीले लुटेरा समूहको खोजीका लागि जिल्ला प्रहरी कार्यालय सुनसरी, इलाका प्रहरी कार्यालय देवानगन्ज र हरिनगरा, प्रहरी चौकी भुटाहालगायतका विभिन्न स्थानमा प्रहरी युनिटबाट खोजी कार्य अघि बढाएको छ।