बारा हत्या प्रकरण: शंकास्पद व्यक्तितर्फ अनुसन्धान अगाडि बढाउन प्रहरी असफल

बारा - कलैयास्थित रामराजा बहुमखी कलेजका प्रमुख हरिभूषण कुशवाहाको गोली हानेर हत्या गरिएको ८ दिन पुरा भएको छ ।

गोली लागेलगत्तै कुशवाहले जिल्ला प्रहरी कार्यालय बाराका प्रहरी उपरीक्षक महेन्द्र खड्कालाई फोन गरेर जानकारी दिएपनि प्रहरीले भने घटनामा संलग्नलाई अझै पक्राउ गर्न सकेको छैन । क्याम्पस प्रमुख कुशवाहाले दिएको जानकारी अनुसार प्रहरीले घटनाको मुख्य अभियुक्ततर्फ अनुसन्धान अगाडि बढाउन पर्ने थियो तर अपराधी समात्न नसक्ने प्रहरीले सर्वसाधारणलाई पक्राउ गरेर दुख दिन थालेको भन्दै स्थानीयले दुखेको पोखेका छन ।

---

बाराको आदर्श कोतवाल गाउँपालिका– २ खजुरियाबाट मोटरसाइकलमा कलैया जाने क्रममा आदर्श कोतवाल गाउँपालिका–३ बातरामा गोली प्रहार भएपछि क्याम्पस प्रमुख कुशवाहाले तत्कालै फोनबाट आफूमाथि गाउँकै सुरेन्द्र कुशवाहले गोली प्रहार गरेको भनेर प्रहरी र नातामा भाइ पर्ने शेखरलाई जानकारी गराएका थिए । ‘साँझ ५.१५ मा दाजुको मोबाइलबाट फोन आयो, शेखरले भने, एकदमै मलिन स्वरमा मलाई सुरेशले गोली हान्यो मात्रै भनेर फोन राख्नुभयो ।’ त्यसपछि आफूहरू आत्तिदै दौडेर घटनास्थलमा पुग्दा उहाँ लडिसक्नुभएको थियो ।’​

मृतकले नै गोली प्रहार गर्ने मान्छेको नाम बताएको अवस्थामा प्रहरीले स्थानीय राजनीतिक अन्तरविरोधको प्रभावमा परेर एमाले कार्यकर्ताहरूलाई पक्राउ गरेर झुटा मुद्दामा फसाउने प्रयास गरेको आदर्श कोतवालका एमाले नेता लालबाबु यादवले बताए । घटनामा संलग्न रहेको आरोपमा प्रहरीले गाउँपालिकाका वडा नम्बर २ का पूर्ववडाध्यक्ष एवं एमालेका कार्यकर्ता विनोद पटेलसहित पटेलका भाइ रामेश्वर, भतिजा सिकेन्द्र, नरेन्द्र र एमालेका कार्यकर्ताहरू बसन्त पासवान र अगन्धलाई पनि पक्राउ गरेको यादवले बताए ।

‘हत्या गर्ने मान्छे यकिन हुँदाहुँदै पनि घटनामा संलग्न नै नभएका सर्वसाधारणलाई समात्ने काम भएको छ, यादवले भने, स्थानीय राजनीतिक द्वन्द्वको प्रभावमा परेर प्रहरी प्रशासनले एमाले कार्यकर्तालाई छानीछानी झुटा मुद्दामा फसाउने प्रयासमा लागेको देखिन्छ ।’ उनले घटनापछि प्रहरीले गाउँमा निगरानी बढाएर पक्राउ गर्न थालेपछि दर्जनभन्दा बढी एमाले कार्यकर्ताहरू घर छोडेर अन्यत्र लागेको पनि जानकारी दिए ।​

लालबाबुका अनुसार स्थानीय रमपत हजरा र रन्जित पण्डितको घर समेत तोडफोड र लुटपाट गरिएको छ । घटनालगत्तै हजराको घर तोडफोड गर्ने स्थानीयको समूहले पण्डितको घरमा भने शुक्रबार राति आक्रमण गरेर लुटपाट गरेको हो । सो समूहले पण्डित र उनको छोरामाथि कुटपिट पनि गरेको उनको भनाई छ । लुटपाटको घटनापछि च्युटाहाबाट पुगेको प्रहरी टोलीकै सामुन्नेमा उनीहरूमाथि कुटपिट गरिएको बताइएको छ ।

आदर्शकोतवाल गाउँपालिका वडा नम्बर २ स्थित खजुरियास्थित घरबाट मोटरसाइकलमा कलैयातर्फ फर्किँदै गरेको अवस्थामा पछाडिबाट एउटा मोटरसाइकलमा आएका सुरेन्द्रसहित २ जनाले बतरा गाउँ नजिकको सडकमा क्याम्पस प्रमुख कुशवाहाको कोखमा गोली प्रहार गरेको प्रत्यक्षदर्शीहरूले बताएका छन ।

सोही क्रममा मोटरसाइकल रोकेर क्याम्पस प्रमुख कुशवाहाले फोनबाट कुरा गरेको प्रत्यक्षदर्शी नरेश साहले बताए । ‘हामी सडक नजिकैको खेतमा काम गरिरहेका थियौं, साहले भने, एक्कासि मोटरसाइकलको टायर पड्केको जस्तो ठूलो आवाज आयो, उनले भने, गएर हेर्दा त माडसाबको शरीरबाट रगतको भल निस्किँदै थियो ।’ गोली लागिसकेपछि पनि १०/२० मिटर परसम्म मोटरसाइकल चलाएर जानुभएका कुशवाहाले त्यसपछि आफै ओर्लेर फोनमा कुरा गरेको आफूहरूले देखेको उनले सुनाए ।

नेपाली सेनाका पूर्व जनावसमेत सुरेन्द्रले गाउँमा तत्कालीन माओवादी र जनतान्त्रिक समूहसँग मिलेर एमाले कार्यकर्ता विनोदको परिवारका सदस्यहरूको पनि हत्या गरेको स्थानीयले बताएका छन । विनोदका भाइ भोलाको ०६२ सालमा र विनोदको काकाको छोरा सुरेशको ०७० सालमा सुरेन्द्रले नै गोली हानेर हत्या गरेको उनीहरुको भनाई छ ।

त्यतिबेला कुशवाहा परिवारसँग निकट सुरेन्द्र पछिल्लो पटक गाउँको जग्गा विवाद र मिटरब्याजी सम्बन्धी मुद्दामा उनीहरूबीच दुरी बढेको थियो । सुरेन्द्र मिटरब्याजमा पैसा लगानी गर्ने र सर्वसाधारणको जग्गा हडप्ने कार्यमा संलग्न थिए । गाउँकै सवा कट्ठा जग्गाको स्वामित्वलाई लिएर क्याम्पस प्रमुख कुशवाहा र सुरेन्द्रबीच विवाद बढेको स्थानीयको भनाइ छ ।

यसैबीच गाउँकै  एकजना पासवान थरका व्यक्तिलाई मिटरब्याजमा दिएको रकमको बारेमा जिल्ला प्रशासन कार्यालयले बोलाएर कारबाही शुरु गरेपछि सुरेन्द्र लुकीछिपी बस्दै आएका थिए । डेढ/दुई महिनादेखि गाउँमा नदेखिएका कुशवाहा घटनाको दिनमा गाउँबाट मोटरसाइकलमा क्याम्पस प्रमुखको पिछा गर्दै गएका थिए ।

अघिल्लो स्थानीय तहको निर्वाचनमा एमालेका विनोद पटेल वडा अध्यक्षमा निर्वाचित बनेका थिए भने गत निर्वाचनमा सो वडामा कांग्रेसका मनोज मेहता वडा अध्यक्षको चुनाव जितेका छन ।

यता जिल्ला प्रहरी कार्यालय बाराका प्रहरी उपरीक्षक खड्काले अनुसन्धानको क्रममा केही मान्छेहरूलाई नियन्त्रणमा लिएको भएपनि निर्दोष देखिए छोडिने बताए । उनले घटनाको बारेमा अनुसन्धान भइरहेको र चाँडै नै अपराधी पक्राउ पर्ने बताए ।