उदयपुरमा बर्षाले डुबानमा, उद्धार कार्य जारी

उदयपुर - अविरल वर्षाको कारण उदयपुर जिल्लाको विभिन्न ठाउँमा डुबानमा परेका तथा डुबानमा पर्ने सम्भावित ठाउँहरूमा उद्धार कार्य जारी रहेको छ ।

सोही जिल्लाको बेलका नगरपालिका–१ भालमन्ती भौडाहास्थित त्रियुगा नदी र भालमन्ती खोलामा पानीको बहाव बढी बस्ती पस्दा डुबानमा परेकाहरूलाई सुरक्षित स्थानमा सारिएको छ । उक्त स्थानमा सशस्त्र प्रहरी बल नेपाल नम्बर ५ गण उदयपुर र नेपाल प्रहरीको संयुक्त टोली खटिई डुबानमा परेकाहरूको सकुशल उद्धार गरेको हो ।

---

त्यसैगरी बेलका नगरपालिका–२ स्थित करैया, पुरनदह र मुसहरी बस्तीमा त्रियुगा नदीमा पानीको बहाव बढी बस्तीमा पस्दा डुबानमा परेका करिब २ सय ५० घरपरिवारलाई सो गण तथा नेपाल प्रहरीको टोलीले सुरक्षित स्थानमा सारेको हो ।

त्यस्तै चौदण्डीगढी नगरपालिका–७ स्थित उद्धार खोलामा आएको बाढीले बाँध कटान गरी सो ठाउँको खसी बजार, मदनचोक र बगरकोटमा पस्ने सम्भावना भएपछि नं. ५ गण उदयपुरबाट खटिएको सुरक्षा फौज, नेपाल प्रहरी र स्थानीय बासिन्दाले जाली लगाई बाँध निर्माण गरेका छन् ।