भ्रष्टाचारका अभियुक्त बने प्रधानाध्यापक र सहायक प्रधानाध्यापक

काठमाडौं - विद्यालय भवन निर्माणमा आफूखुसी खर्च गरी भ्रष्टाचार गरेको अभियोग लगाउँदै रामेछाप दोरम्बास्थित कण्ठेश्वर माध्यमिक विद्यालयका प्रधानाध्यापक र सहायक प्रधानाध्यापकविरुद्ध अख्तियार दुरुपयोग अनुसन्धान आयोगले मुद्दा चलाएको छ ।

आयोगले तत्कालीन प्रधानाध्यापक रामबाबु कँडेल र सहायक प्रधानाध्यापक/लेखापाल रामलाल कँडेलले १२ लाख ८४ हजार १ सय २२ रुपैयाँ भ्रष्टाचार गरेको अभियोग लगाएको हो । 

---

आयोगका अनुसन्धान अनुसार, तिनले विद्यालय कोषको रकम आफूखुशी झिकी भवन निर्माणमा खर्च भएको देखाउँदै व्यक्तिगत लाभ लिएका छन् । त्यसअतिरिक्त विद्यालय कोषको रकम खर्च गर्दा कानुनको परिपालना नगरी अनावश्यकरूपमा खर्च गरेको भेटिएको छ । आयोगले बिगो बमोजिम जरिवाना र कैद सजायको दाबी गरेको छ ।

त्यसरी विद्यालय व्यवस्थापन समितिका अध्यक्ष विनोद थापामगरले खर्चको आवश्यकतालाई ध्यानमा नराखी विद्यालय कोषको रकम खर्च गर्ने कार्यमा सहमति जनाएको र विद्यालय कोषको नियमन गर्न नसकेको जिकिरसहित ‘मतियार’का रुपमा भ्रष्टाचारको अभियोग लगाएको छ । अध्यक्ष थापामगरविरुद्ध पनि प्रधानाध्याक र सहायक प्रधानाध्यापक सरहकै बिगो दाबी आयोगले लिएको छ । सरकारी वा सार्वजनिक सम्पत्ति हानिनोक्सानी गर्ने कार्यको मतियार भएको अभियोगसहित मुद्दा दायर गरेको आयोगले जनाएको छ ।