राजतन्त्रको पक्षमा निस्केका आवाजबाट सतर्क हुनुपर्छ : महामन्त्री शर्मा

लुम्बिनी- नेपाली कांग्रेसका महामन्त्री विश्वप्रकाश शर्माले अहिलेको अवस्थामा राजतन्त्रको पक्षमा निस्केका आवाजबाट सतर्क हुनुपर्ने बताएका छन् । आज बुटवलमा भएकाे नेपाली कांग्रेस लुम्बिनी प्रदेश समितिको प्रथम सम्मेलनमा बाेल्दै उनले यस्ताे बताएका हुन् ।

महामन्त्री शर्माले हिजोको अवस्थामा मुलुकको विकासका लागि राजसंस्थाले गरेका काम र अहिलेको विकासको अवस्थाका विषयमा पनि समीक्षा गरेर समाजलाई बुझाउनुपर्ने जिम्मेवारी आएको जिकिर गरे ।

---

महामन्त्री शर्माले पार्टीलाई उत्पादनमा लगाउनुपर्ने नेताका हरेक पक्षमा साथ दिन जनसङ्गठन र पार्टीलाई क्रियाशील बनाउन आग्रह समेत गरे । उनले अहिले केही पुराना र नयाँ दलहरूले मिसन २०८४ का नाममा गरेको कार्यक्रम नेपाली कांग्रेसका लागि जरुरी नभएको बताए । उनले भगवान् बुद्धको आर्शीवाद भएको देशका नागरिक होऔँ भने सङ्कल्पका साथअघि बढ्न र उत्साहलाई लिएर अगाडि बढ्न पनि आग्रह गरे ।

उनले अब बलियो कांग्रेस बनाउन सबैको सङ्कल्प आवश्यक रहेको भन्दै देश बनाउने सङ्कल्प अब लुम्बिनीबाट सुरु गर्न आह्वान गरे ।