मतदान गर्न वञ्चित गरिएको भन्दै अदालतमा रिट

सुर्खेत। स्वतन्त्र विद्यार्थी युनियन (स्ववियु) निर्वाचनमा मतदान गर्ने अधिकारबाट वञ्चित गराइएको भन्दै विद्यार्थीहरुले रिट दायर गरेका छन् । विद्यार्थीहरुले मध्यपश्चिम विश्वविद्यालय लगायत पाँच वटा कार्यालयविरुद्ध उच्च अदालत सुर्खेतमा रिट दायर  गरेका हुन् । विश्वविद्यालय अन्तर्गतकै ‘स्कुल अफ म्यानेजमेन्ट’ (मोसुम)मा अध्ययनरत तीन जना विद्यार्थीले उच्च अदालत सुर्खेतमा रिट दायर गरेका हुन् । रिट दायर गर्नेमा मोसुममा अध्ययनरत विद्यार्थी भुवन बुढा, सुदिप महतारा र खेमु शाही रहेका छन् ।

मतदान गर्ने अधिकारबाट वञ्चित गर्न लागेकाले अदालतमा रिट दायर गरेको स्कुल अफ म्यानेजमेन्ट(मुसोम) मा अध्ययनरत भुवन बुढाले जानकारी दिए । ‘हामी पनि मध्यपश्चिमाञ्चल विश्वविद्यालय अन्तर्गतका विद्यार्थी हौ त्यसैले् हामीलाई पनि भोट हाल्न पाउनुपर्छ’ अदालतमा रिट दायर गरेका बुढाले भने, ‘हामीलाई भोट हाल्ने अधिकारबाट वञ्चित गराइनु हुँदैन ।’

---

आज दिउँसो उनीहरूले मध्यपश्चिम विश्वविद्यालय, स्कुल अफ म्यानेजमेन्ट (मुसोम), स्वतन्त्र विद्यार्थी युनियन निर्वाचन समिति र केन्द्रीय विभागको स्वतन्त्र विद्यार्थी युनियन निर्वाचन अधिकृतको कार्यालय लगायत पाँच वटा कार्यालयलाई विपक्षी बनाइ रिट दायर गरेका छन् ।

मोसुममा करिब चार सय विद्यार्थीहरू अध्ययनरत छन् । मोसुममा अध्ययनरत विद्यार्थीको मतदान गर्न पाउने अधिकारलाई कुण्ठित गर्न खोजिएको उनीहरूको आरोप छ । उनीहरूले अन्तरिम आदेश सहितको उत्प्रेषणयुक्त परमादेश लगायत उपयुक्त आदेश जारी गरी पाउँ भनेर रिट निवेदन दायर गरेका छन् । 

यता उच्च अदालत सुर्खेतका  सूचना अधिकारी सरोजनिधि वाग्लेले रिट दायर भएको बताए । दायर भएको रिट भोलि एकल इजलासमा पेस हुने वाग्लेले जानकारी दिए ।