काठमाडौँ : कोभिड-१९ संक्रमितको संख्या दैनिक ८ हजारभन्दा बढी छ । दैनिक १५० भन्दा बढी संक्रमितको मृत्यु पनि भइरहेको छ । संक्रमितलाई आइसोलेसनमा राख्‍न समस्या र भारतलगायत तेस्रो मुलुकबाट आएका नागरिकलाई राख्‍न क्वारेन्टाइन तथा आइसोलेसन सेन्टरसमेत बनाउन सकेको छैन ।

वैशाख १३ गतेको मन्त्रिपरिषदको बैठकले नेपाली सेनालाई आठ स्थानमा आइसोलेसन सेन्टर बनाउन दिने निर्णय गरेको थियो । गड्डचौकी, गौरीफन्टा, जमुनाह, कृष्णनगर, बेलहिया, विरगञ्‍ज, रानी (विराटनगर) र काँकडभिट्टा स्थान तोकिसकेको छ ।

---

भारतमा संक्रमितको संख्या बढिरहेको समयमा उताबाट भित्रिएका नागरिकलाई राख्‍न तथा उपचार गर्न केही दिनअघि प्रधानमन्त्री केपी शर्मा ओलीले राष्ट्रको नाममा गरेको सम्बोधनमा नेपाली सेनालाई नेपाल-भारत सीमामा आइसोलेसन सेन्‍टर बनाउन समेत निर्देशन दिएका थिए ।

संक्रिय संक्रमितको संख्या एक लाख १५ हजार भन्दा बढी छ । कोभिडले छ हजार भन्दा बढी नागरिकको अमूल्य ज्यान गइसक्दा समेत सरोकारवाला निकायले चासो दिएको देखिदैन ।

सरकारले होल्डिङ सेन्टर निर्माण गर्न निर्देशन दिएको करिब एक महिना भएको छ । तर सेनाले कोभिड महामारी उत्कर्षमा पुगेको बेलामा पनि आइसोलेसन सेन्टर बनाउन सकेको छैन । अर्थ मन्त्रालयले होल्डिङ सेन्टर निर्माणका लागि १६ करोड बजेटसमेत विनियोजन गरिसकेको छ ।

'होल्डिङ् सेन्टर निर्माण गर्न ६ स्थानमा जग्गा पायौँ'

सरकारको निर्देशनअनुसार छ स्थानमा होल्डिङ सेन्टर निर्माण गर्न जग्गा पाइसकेको नेपाली सेना प्रवक्ता सन्तोषबल्लभ पौड्यालले जानकारी दिए । दुई ठाउँमा भने जग्गा उपलब्ध हुन बाँकी रहेको उनले बताए । सुदुरपश्‍चिम बाहेक नेपालगञ्ज तथा अन्य जिल्लामा स्थान पाइसकेको उनले जानकारी दिए ।

'होल्डिङ् सेन्टर निर्माणका लागि अर्थ मन्त्रालयबाट बजेट प्राप्‍त भइसकेको छ,' पौड्यालले भने,' निर्माणका लागि ५ गते बोलपत्र आह्‍वान भइसकेको छ । १३ गते मूल्यांकन खुल्नेछ ।'

जेठ अन्तिम सातादेखि निर्माण प्रक्रिया अगाडि बढने पौड्यालले जानकारी दिए । निर्माणकर्तालाई छिटो निर्माण गर्नेगरी सम्झौता गर्ने उनले बताए । 'तीन महिनासम्ममा निर्माण सम्पन्‍न गर्ने गरी सम्झौता गरिन्छ,' उनले भने ।

पौड्यालले कोभिडको दोस्रो लहर चलेको समयमा होल्डिङ सेन्टर निर्माण सुरु गर्न नसकिएको स्वीकारेका छन् । कोभिडको दोस्रो लहर चलेको समयमा प्रयोगमा ल्याउन नसके पनि तेस्रो लहर आएको खण्डमा होल्डिङ सेन्टर काम लाग्न सक्ने उनको भनाइ छ ।

काठमाडौँ उपत्यकामा डिसिएमसीले एक हजार बेडको आइसोलेसन बनाउने निर्णय गरेको पौड्यालले जानकारी दिए । उनका अनुसार इचंगुनारायणको दुवाकोटको इन्जिनिरियङ् कलेज, खरीपाटीको आइसोलेसन सेन्टर, मनमोहन र आयुर्वेद अस्पतालमा निर्माण हुने भएको छ ।

यो पनि 

होल्डिङ/आइसोलेसन सेन्टर बनाउन जग्गा उपलब्ध नहुँदा सेना अन्यौलमा

 'आवश्यक जग्गा उपलब्ध गराउँछौ'

 सेनाले होल्डिङ सेन्टर र आइसोलेसन निर्माण गर्ने प्रक्रिया अघि बढाइसकेको जिल्ला प्रशासन कार्यालय मोरङको प्रमुख जिल्ला अधिकारी कोशहरि निरौला बताउँछन् ।

विराटनगरस्थित जुटमिल एरियामा करिब तीन विघाहा जग्गा जमिनको व्यवस्था भइसकेको उनले बताए । उनकाअनुसार आवश्यक जग्गा उपलब्ध गराउन सकिन्छ । अस्थायी अस्पताल शैलीको निर्माण गर्ने तयारी भइरहेको छ ।

'आइसोलेसन सेन्टरको डिजाइन पनि आइसकेको छ,' निरौला भन्छन,' ब्लक शैलीमा बन्नेछ । 'प्रिफ्याब'को बन्ने र त्यसमा ५०-५० जना राख्‍न मिल्ने गरी बनाउन लागिएको छ ।' स्वास्थ्यकर्मी बस्नका लागि छुट्टै र बाहिरबाट आएकालाई छुट्टै निर्माण गर्न लागेको निरौलाले जानकारी दिए ।

'सेनालाई १६ करोड दियौँ'

होल्डिङ सेन्टर निर्माणका लागि नेपाली सेनालाई १६ करोड बजेट उपलब्ध गराइसकेको अर्थ मन्त्रालयका प्रवक्ता महेश आचार्यले जानकारी दिए । सरकारको निर्देशन अनुसार रकम उपलब्ध गराएको उनको भनाइ छ । माग गरिएको समयमा रकम उपलब्ध गराइएको उनले बताए ।

'संक्रमण मत्थर भएपछि निर्माण'

सेनाले निर्माण गर्ने होल्डिङ सेन्टरका लागि आवश्यकीय सहमति दिइसकेको स्वास्थ्य मन्त्रालयले जनाएको छ । संक्रमण तीव्र रूपमा फैलिइरहेको समयमा सेनाले आइसोलेसन तथा होल्डिङ् सेन्टर निर्माण गर्न नसक्दा संक्रमित भइसकेकालाई राख्‍न असहज अवस्था भइसकेको मन्त्रालयका एक कर्मचारीले बताए ।

'संक्रमण तीव्र रूपमा फैलिएको समयमा आइसोलेसन सेन्टर निर्माण भएको संक्रमितलाई राखी उपचार गर्न सकिन्थ्यो,' उनले भने,' संक्रमण मत्थर भएपछि निर्माण भएको के काम हुनु र ?'