तनहुँमा आठ फिट लामो अजिङ्गरको उद्धार

तनहुँ- तनहुँको व्यास नगरपालिका-१३ बेलबासमा आठ फिट लामो अजिङ्गरको आज उद्धार गरिएको छ । डिभिजन वन कार्यालय तनहुँका कर्मचारीको सहयोगमा अजिङ्गरको उद्धार गरिएको हो । 

उक्त ठाउँमा केही समय पहिलादेखि अजिङ्गर देखिन थालेको स्थानीयवासी मेघनाथ आचार्यले जानकारी दिए । अजिङ्गर घाइते अवस्थामा रहेकोले उद्धार पश्चात डिभिजन वन कार्यालयमा सुरक्षित राखिएको डिभिजन वन कार्यालयका कर्मचारी अर्जुनकुमार श्रेष्ठले जानकारी दिए । 

---

उद्धार गरिएको अजिङ्गरलाई सुरक्षित रूपमा सामुदायिक वनमा छाडिने बताइएको छ । 'स्थानीयवासीले केही समय पहिलादेखि उक्त अजिङ्गर यस क्षेत्रमा देखिएको जानकारी दिनुभएको थियो,' वन कार्यालयका कर्मचारी श्रेष्ठले भने, 'आज पनि देखिने बित्तिकै खबर गरेपछि हामीले उद्धार गरेर ल्याएका छौँ ।' रासस