नेपाल-चीनको संयुक्त वक्तव्यमा के छ ? {संयुक्त वक्तव्य}

काठमाडौँ- नेपाल र चीनको संयुक्त वक्तव्य जारी भएको छ । नेपाल र चीनबीच सोमबार भएको १२ सम्झौता र एक सहमतिबारे मंगलबार बिहान संयुक्त वक्तव्य जारी भएको हो ।

चीन भ्रमणमा रहेका प्रधानमन्त्री पुष्पकमल दाहाल प्रचण्ड र चिनियाँ राष्ट्रपति सी चिनफिङबीच भेटमा सन् २०१९ मा भएको सीको नेपाल भ्रमणबारे  स्मरण गरेका थिए ।

---

संयुक्त वक्तव्यमा चिनियाँ पक्ष नेपाली उत्पादनलाई चीन निर्यातमा सहजीकरण गर्न तयार भएका छन् । नेपालबाट रागाँ र भैंसीको मासु चीन निर्यात गर्नका लागि स्वीकृति प्रक्रियालाई तीव्रता दिने उल्लेख छ ।

नेपाललाई भूपरिवेष्ठित मुलुकबाट भूजडित मुलुकमा परिणत गर्न चीनको पारवहन यातायात र राजमार्गको उपयोग सम्बन्धमा विगतमा हस्ताक्षर गरिएका सहयोग सम्बन्धी दस्तावेज कार्यान्वयनलाई निरन्तरता दिन नेपाल र चीन सहमत भएको वक्तव्यमा उल्लेख छ ।

नेपाली अमिलो जातका फलफूल निर्यातका लागि आवश्यक पर्ने प्रमाणपत्र उपलब्ध गराए चीनले सहयोग गर्ने भएको छ । त्यस्तै चीनले याक, नाक र च्याङ्ग्रा प्रजननका लागि सहयोग गर्नेछ ।

अरनिको राजमार्ग चौथो चरणको काम सुरु गर्न चिनियाँ पक्ष तयार रहेको उल्लेख छ ।

टोखा–छरे सुरुङमार्गको सम्भाव्यता अध्ययनलाई तीव्रता दिन दुवै पक्ष सहमत भएका छन् ।

ऊर्जा क्षेत्रमा विशेष गरी जलविद्युत, सीमापार प्रसारा लाइन र सम्बद्ध सबस्टेसनको विकासमा सहयोगलाई थप प्रवर्द्धन गर्दै केरुङ-रसुवागढी-चिलिमे प्रसारण लाइन बनाउने सहमति भएको उल्लेख छ ।

चीन–नेपाल विद्युतीय ऊर्जा सहयोग योजनालाई अन्तिम रूप दिन संयुक्त संयन्त्रको दोस्रो बैठक छिट्टै बस्न नेपाल र चीन सहमत भएका छन् । जिलोङ/केरुङ-रसुवागढी-चिलिमे २२० केभी क्रस बोर्डर पावर ट्रान्समिसन लाइनको निर्माण चाँडो सुरु गर्ने संयुक्त वक्तव्यमा उल्लेख छ ।

त्यस्तै चीनले नेपालीलाई रेल सम्बन्धी तालिम दिने भएको छ । केरुङ-काठमाडौं रेलवेको सम्भाव्यता अध्ययनको प्रगतिमा दुवै पक्ष सन्तुष्ट रहेको र नेपाल-चीन रेलवे सहयोग सम्बन्धी आठौं बैठक जतिसक्दो चाँडो आयोजना गर्ने वक्तव्यमा उल्लेख छ ।

नेपाल-चीन सीमा व्यापारका परम्परागत नाकाहरु पुनः चाँडै खोल्ने सहमति भएको छ ।

त्यस्तै चेन्ताङ-किमाथाङ्का र रिबु-ओलाङचुङगोला बन्दरगाहलाई खुलाउन सम्वाद जारी राख्ने भएका छन् ।

त्यसैगरी टोखा-छहरे सुरुङमार्ग आयोजनाको सम्भाव्यता अध्ययन र काठमाडौं चक्रपथ आयोजनाको दोस्रो चरणको कामलाई तीव्रता दिने भएको छ ।