बुद्धका उपदेश पाठ्यक्रममा समावेश गर्न राष्ट्रपतिको आग्रह

लुम्बिनी – राष्ट्रपति विद्यादेवी भण्डारीले गौतम बुद्धका कालजयी उपदेश तथा शिक्षालाई आ–आफ्ना पाठ्यक्रममा समावेश गर्न विश्वविद्यालयलाई आग्रह गरेकी छन् । बिहीबार लुम्बिनीमा लुम्बिनी बौद्ध विश्वविद्यालयको १७ औं वार्षिकोत्सव तथा त्रियान प्रज्ञा सम्मेलन एवम् केन्द्रीय पुस्तकालय भवनको समुद्घाटन समारोहलाई सम्बोधन गर्दै उनले उक्त आग्रह गरेकी हुन् ।

छब्बीस सय वर्षदेखि एशिया महाद्वीपको भूगोलमा स्थापित बौद्ध दर्शन आजको युगमा सम्पूर्ण विश्वभरि फैलिइरहेको र विश्वका प्रतिष्ठित विश्वविद्यालयहरूले बौद्ध दर्शनलाई आफ्नो प्राज्ञिक कार्यक्रमका रूपमा समावेश गर्दै गएको उल्लेख गरिन् । बुद्धकालीन ज्ञान र शिक्षालाई वर्तमान सन्दर्भसँग जोडेर शिक्षा प्रणाली, पाठ्यक्रम र पठनपाठनका क्षेत्रमा अवलम्बन गर्नसके लुम्बिनी विश्वविद्यालयको बहुआयामिकता थप अभिवृद्धि हुने उनको विश्वास छ ।

---

‘यसबाट हाम्रो महान बौद्ध सभ्यताको विरासतलाई भावी पुस्तामा हस्तान्तरण गर्न मद्दत पुग्न सक्दछ । प्राज्ञिक विकासको पूर्वसर्त विश्वविद्यालयको स्वायत्तता र प्राज्ञिक स्वतन्त्रता हो,’ राष्ट्रपति भण्डारीले भनिन्, ‘विश्वविद्यालयमा विशुद्ध प्राज्ञिक वातावरण कायम गरी राज्यका लागि आवश्यक दक्ष जनशक्तिको उत्पादन गर्न पाठ्यक्रमलाई अनुसन्धान केन्द्रित बनाउनु पर्दछ ।’  

हाम्रो मुलुकबाट ठूलो संख्यामा अध्ययनका लागि विदेश जाने बाध्यतालाई न्यूनीकरण गर्न उच्च शिक्षामा लगानी वृद्धि गर्दै शैक्षिक गुणस्तर अभिवृद्धि गर्नुपर्ने उनको भनाइ छ । राष्ट्रपति भण्डारीले बौद्ध विश्वविद्यालयले लिएको आफ्नो लक्ष्य र उद्देश्यलाई ओझेलमा नपारी स्वदेशी तथा विदेशी विद्यार्थी एवम् अनुसन्धानकर्तालाई आकर्षित गर्नुपर्नेमा जोड दिइन् । रासस