सूर्य चिन्ह नपाए आँधीवेहरी ल्याउँछौं : दाहाल
पोखरा : नेकपा (दाहाल-नेपाल समूह)का अध्यक्ष पुष्पकमल दहालले आफूहरूले सूर्य चिन्ह नपाए आँधीवेहरी ल्याउने बताएका छन् । मंगलबार गण्डकी प्रदेशस्तरीय कार्यकर्ता भेलालाई पोखरामा सम्बोधन गर्दै अध्यक्ष दाहालले प्रधानमन्त्री केपी शर्मा ओली समूहले सूर्य पाउने बताउँदै हिँडेपनि संविधान र कानुन अनुरुप आवश्यक संख्या आफूहरूसँग रहेको बताए । सूर्य चिह्न नपाए फेरी आँधी ल्याइने उनको टिप्पणी थियो । ‘सूर्य चिह्न नपाउने अवस्था आए यहाँ आँधीवेहरी आउँछ,’ दाहालले भने ।
निर्वाचन आयोगले ५० प्रतिशत केन्द्रीय सदस्य रहेको समूहलाई चुनाव चिन्ह र नाम दिने भन्दै सोमबार आफूहरू निर्वाचन आयोगमा गएपछि झनै प्रष्ट भएको उनले बताए । ‘हामीसँग ७० प्रतिशत केन्द्रीय सदस्य हुनुहुन्छ, नाम र चिह्न हामी नै पाउनेछौं भन्नेमा विश्वस्त छौं,’ दाहालले भने ।
प्रधानमन्त्री ओलीले जस्तो आफू प्रहशन गर्दै नहिँड्ने र विधि विधानका लागि पोखरा आएको उनले बताए । ‘हामी यहाँ हाँस्य व्यङ्ग्य र उखान टुक्काका लागि आएका होइनौं, पार्टीमा भएको के हो त्यो बुझाउन आएका हौं,’ दाहालले भने ।
ओलीले जनयुध्दलाई कुहिएको फर्सीको संज्ञा दिएकोमा आपत्ति जनाउँदै दाहालले भने, ‘तपाईंहरू नै भन्नुहोस् के जनयुध्द कुहिएको फर्सी हो त ?’ जनयुध्दसम्बन्धी राजनीतिक प्रतिवेदनमा ओलीले पनि हस्ताक्षर गरेको सम्झाउँदै उनले त्यो अभिव्यक्ति स्वीकार्य नरहेको जनाए ।
दाहालले केपी शर्मा ओलीलाई अध्यक्ष, प्रधानमन्त्री र संसदीय दलको नेताबाटै निलम्बन गर्ने तयारी गर्दा संसद विघटन गरेको खुलाए । ‘बैठकले नै ओलीले छाड्नुपर्छ भन्ने थियो, गल्ती नसच्याएकाले उनलाई हटाउने तयारी गर्दा सदन विघटन भयो,’ दाहालले भने ।
अब ओली समूहको नै पतन हुने उनको भनाइ थियो । यसका लागि कार्यकर्ताले केही महिना खटेर काममा लाग्नुपर्ने उनको सुझाव थियो । ओलीले आफैंले कलंकको टीका लगाएको उनको धारणा थियो । ओलीले कलंकको टीका लगाएपछि नै आफूहरूको जीत सुनिश्चित भएको उनले जनाए । उनले भने, ‘केपी गुटको पतन अनिवार्य छ। ओलीले कलंकको टीका लगाइसक्नुभयो ।’ यसका लागि विद्रोह गर्नुपर्ने उनको टिप्पणी थियो । ‘फेरि विद्रोह गरेको अनुभूति भएको छ, सडकमा आन्दोलन गर्दा गर्व महशुस हुन्छ,’ उनले भने ।
प्रधानमन्त्री ओलीले सर्वोच्च अदालतलाई दबाबमा पार्न खोजेको भनाइ दाहालको थियो । 'यो राज्यको दुरूपयोग बाहेक के हो ? सर्वोच्चलाई दबाबमा पार्न खोज्ने ?’ उनको प्रश्न थियो ।
अर्का अध्यक्ष माधव कुमार नेपालले ओली केही गरेपनि नसुध्रने बताए । बालुवालाई पेलेर तेल निस्किन नसकेझैं ओलीलाई पनि सुधार्न नसकिएको उनको धारणा थियो । ‘अस्थिरतातिर धकेल्न खोजेका बेला पनि सुधार्न खोज्दा नसुध्रिने ?’ उनले भने । ओली नेकपाको नभइ ओली फाउण्डेसनको अध्यक्ष भएको उनको जिकिर थियो ।
आफू महासचिव हुँदा देखिनै ओली गुटबन्दीमा लागेको नेपालले बताए । ‘गुटबन्दी र अहंकार ओलीको पर्याय भयो,’ नेपालले भने, ‘आफ्नो विरोधी को छन् ? भन्दै नियाल्दै बस्ने ओलीको खुराफाती बानी छ ।’
