पोखरा : गण्डकी प्रदेशमा नेकपाका दुई समूह ओली र दाहाल-नेपालका सांसदहरूको छुट्टाछुट्टै बैठक बसेको छ ।  दाहाल-नेपाल समूहका सांसदहरूको बैठकले अरु दलका सांसदहरूसँग समन्वय गरेर आफ्नो रणनीति तय गर्ने निर्णय गरेको छ । पूर्वमाओवादीका ११ र माधवकुमार नेपाल समूहका १ गरी १२ जना सांसद बैठकमा सहभागी थिए । सभामुख नेत्रनाथ अधिकारी पूर्वमाओवादी नेता रहेपनि भेलामा सहभागी भएनन् । 

सरकारलाई समर्थन गर्ने वा नगर्नेबारे अरु दलसँगको बैठक पछि निर्णय लिइने गण्डकी प्रदेश आर्थिक तथा विकास समितिका सभापतिसमेत रहेका सो समूहका नेता दीपक कोइरालाले बताए । बैठकमा अविश्वासको प्रस्तावबारे कुरा उठेपनि आफूहरूको उपस्थितिको मूल्यांकन गरेर मात्र त्यसबारे निचोडमा पुगिने उनले बताए । 

‘बैठकमा कुरा त उठिहाल्छ तर त्यसबारे अरुसँग बैठकब सेर अनि हाम्रो अवस्था हेरेर निर्णय लिन्छौं,’ उनले भने । सो समूहका हरिबहादुर चुमान र लेखबहादुर थापा अहिलेकै सरकारमा मन्त्री छन् । आन्तरिक मामिला तथा कानुन मन्त्री हरिबहादुर चुमानले सरकारमै रहेपनि आफूहरू विरोध गरिरहने बताउने गर्छन् । 

तर आजको बैठकले मुख्यमन्त्री पृथ्वीसुब्बा गुरुङको ‘एक्सन हेरेर रियाक्सन’ दिने रणनीति लिइएको कोइरालाको भनाइ छ । ‘२ जना मन्त्री हुनुहुन्छ, तर हामी उहाँहरूको एक्सन हेरेर मन्त्री फिर्ता बोलाउने नबोलाउने बारे निर्णय गर्छौं,’ सांसद कोइरालाले भने ।

यता मुख्यमन्त्री समूहको बैठकमा विपक्षी दलसँग बैठक, परामर्श गर्नेबारे छलफल भएको छ । गण्डकी प्रदेश सभाका सत्तारुढ दलका प्रमुख सचेतक मायानाथ अधिकारीले बैठकमा विपक्षी दलसँग छलफललाई तीव्रता दिनेबारे छलफल भएको बताए । ‘मुख्यमन्त्रीज्यूले विपक्षी दलसँग छलफल गरिरहेको छु भन्नुभयो, हामी पनि छलफल गर्ने बारे बहस गर्‍यौं,’ उनले भने । 

बैठकमा मन्त्रीपरिषद् विस्तारबारे समेत कुरा उठेको थियो । ‘मन्त्री हटाउने, राजीनामा माग्ने कुरा भएको छैन । बरु ७ सदस्यीय मन्त्रीपरिषद्लाई ११ सदस्यीय बनाउने कुरा भएको छ ।’ अधिकारीले भने ।