डोल्पा एयरपोर्ट स्तरोन्‍नती : जुफालका स्थानीयलाई १ करोड मुआब्जा

काठमाडौं : सरकारले डोल्पा विमानस्थल स्तरोन्‍नतीको लागि जग्‍गा खरिद गर्न मुआब्जा निर्धारण गरेको छ । जुफाल (ठूलीभेरी नगरपालिका वडा नम्बर ७ र ८) मा रहेको ८ हजार ४ सय ४६ वर्गमिटर जग्गा अधिग्रहण गर्न १ करोड ११ लाख ४८ हजार ७ सय २० रुपैयाँ मुआब्जा निर्धारण गरेको हो ।

५९ संख्यामा रहेका स्थानीयवासीका जग्गा अधिग्रहण गर्ने डोल्पा जिल्‍ला प्रशासन कार्यालयले जानकारी दिएको छ । करिब ४० स्थानमा रहेको जग्गा क्याराभान निर्माण उपभोक्ता समितिको स्वामित्वमा छ ।

प्रति वर्ग मिटर एक हजार ३ सय २० रुपैयाँको दरले मुआब्जा वितरण गर्ने कार्यालयले जानकारी दिएको छ । ‍विमानस्थलको पश्चिम धावनमार्गको भित्र र पश्चिम उत्तरमा पर्ने जग्गा स्थायी रुपमा प्राप्त गर्नुपर्ने भएको उल्लेख छ । ७ दिनभित्र जग्गा प्राप्ति गर्नुपर्ने वा नपर्ने कुनै कारण भए निवेदन दिन कार्यालयले आह्वान गरेको छ ।

---