पिके डायगोनिस्टिकका सञ्चालकमाथि आक्रमण गर्नेविरुद्ध १५ वर्ष कैद माग गर्दै मुद्दा दर्ता

काठमाडौँ - असोज १५ गते गौशालास्थित पिके डायगोनिस्टिक प्रालिका सञ्चालकमाथि आक्रमण भयो । आक्रमण गर्ने दुई जनाविरुद्ध मुद्दा दर्ता भएको छ ।

पिके डायगोनिस्टिक प्रालिका सञ्चालक साबिर हुसेनमाथि आक्रमण गरेको आरोपमा पक्राउ परेका रौतहटको गढिमाई नगरपालिका–९ का ३७ वर्षीय सिकिल देव सहनी र सोही नगरपालिका ९ का ४७ वर्षीय चुतुर्गुन सहनीविरुद्ध मुद्दा दर्ता भएको हो । जिल्ला अदालत काठमाडौंमा मुद्दा दर्ता गरिएको छ ।

---

उनीहरुविरुद्ध ज्यान मार्ने उद्योग र हातहतियार तथा खरखजनाको कसुरमा मुद्दा दर्ता भएको छ । ज्यान मार्ने उद्योगकको कसुरमा १० वर्षसम्म कैद र १ लाख रुपैयाँसम्म जरिवाना हुनसक्ने व्यवस्था छ । हातहतियार तथा खरखजनामा ५ वर्षसम्म कैद र ५० हजार रुपैयाँसम्म जरिवाना हुने व्यवस्था छ ।

लेनदेनको विवादमा हुसेनमाथि आक्रमण भएको प्रहरी अनुसन्धानबाट खुलेको थियो हुसेनमाथि आक्रमण गरेर कटुवा पेस्तोल र चक्कु घटनास्थलमै छाडेर आक्रमणकारी भागेका थिए ।

बाराको कलैया नगरपालिका–२१ घर भई हाल कोटेश्वर बस्दै आएका हुसेनको दाहिने तिघ्रा र ढाडमा चोट लागेको थियो । सुरुमा पेस्तोलबाट प्रहार गरे पनि गोली नपड्किएपछि हुसेनमाथि चक्कु प्रहार गरिएको थियो ।

प्रहरीले घटनास्थलबाट कटुवा पेस्तोल, त्यसमा लाग्ने गोली र चक्कु बरामद गरेको थियो ।