काठमाडौँ: भारतीय क्रिकेट बोर्ड (बीसीसीआई) ले मंगलबार इन्डियन प्रिमियर लिग (आइपीएल) स्थगित भएको घोषणा गर्‍यो । आइपीएलमा बाँकी रहेका खेलहरू कहिले हुन्छ, टुङ्गो छैन । भारतमै हुन्छ वा अन्य मुलुकतर्फ सारिन्छ भन्‍नेबारेमा पनि केही बताइएको छैन । 

यस्तोमा विदेशी खेलाडीहररू घर फर्कने तयारीमा छन् । यद्यपि अस्ट्रेलियन खेलाडीहररूको हकमा भने घर फर्कन सजिलो छैन । किनभने भारतबाट जानेलाई अस्ट्रेलियाले प्रवेश गर्न दिएको छैन । त्यसकारण अस्ट्रेलियन क्रिकेटरहरूले प्रवेश अनुमतीका लागि केही समय पर्खनु पर्नेछ । यस्तो अवस्थामा अस्ट्रेलियन क्रिकेटहरूलाई श्रीलंका वा माल्दिभ्समा राखिने बताइएको छ । 

यसै सन्दर्भमा अस्ट्रेलिया क्रिकेटका प्रमुख कार्यकारी अधिकृत निक हक्लीको भनाइ सार्वजनिक भएको छ । ‘बीसीसीआईसँग कुरा भइरहेको छ । हाम्रा खेलाडीहरूलाई भारतबाट अन्तै सारिनेछ । विकल्पका रूपमा श्रीलंका र माल्दिभ्स छन् । मलाई लाग्छ दुई तीन दिनमा बीसीसीआईले निर्णय गर्छ,’ हक्लीले बुधबार सिड्नीमा स्थानिय पत्रकारहरूसँग कुरा गर्दै भनेका छन् । 

आइपीएल खेलेर घर फर्कने अस्ट्रेलियन खेलाडीहरूलाई बीसीसीआईले हवाई जहाज चाटर्ड गरेर घर पठाउने प्रतिबद्वता जाहेर गरेको पनि हक्लीले बताए ।