काठमाडौँ – महानगरीय ट्राफिक प्रहरी महाशाखाले गोंगबुस्थित नयाँ बसपार्कमा यात्रु सहायता कक्ष सञ्चालन गरेको छ । दसैं, तिहार र छठमा उपत्यकाबाट विभिन्न जिल्ला बाहिरिने यात्रुको सुविधालाई लक्षित गरी महाशाखाले सहायता कक्ष सञ्चालनमा ल्याएको हो ।  

बिहीबार महाशाखाका प्रहरी अधिकृत, स्थानीय प्रहरी, यातायात व्यवसायी, सामुदायिक सेवा केन्द्रका प्रतिनिधि ल्होत्से बहुउद्देश्यीय प्रालिका प्रतिनिधि, ट्राफिक स्वंयम् सेवकको उपस्थितिबीच सहायता कक्ष उद्घाटन गरिएको हो ।

सार्वजनिक यातायातको टिकटसम्बन्धी यात्रुलाई पर्नसक्ने समस्या समाधानका लागि उपत्यकाका विभिन्न स्थानमा सहायता कक्ष सञ्चालन गरिएको महाशाखाका प्रमुख प्रहरी वरिष्ठ उपरीक्षक (एसएसपी) जनक भट्टराईले बताए । 

कोभिड संक्रमणबाट बच्न मास्कको प्रयोग गरी स्वास्थ्य मापदण्ड अपनाएर सेवा लिन एसएसपी भट्टराईले सर्वसाधारणमा आह्वान गरेका छन् । यात्रुको चापका आधारमा उपत्यकाका १४ स्थानमा कक्ष स्थापना गरिने महाशाखाका प्रवक्ता तथा प्रहरी उपरीक्षक सञ्जीव शर्मा दासले बताए ।

बिहीबार नयाँ बसपार्क, गौशाला, बल्खु र कोटेश्वरमा कक्ष सुरु भएको छ र आइतबारभित्र सातदोबाटो, कलंकी, नागढुंगा, स्वयम्भू, माछापोखरी, चाबहिल, जगाती, सुन्धारा, रत्नपार्क र फर्पिङमा कक्ष सञ्चालन गरिने प्रवक्ता दासले जानकारी दिए ।

‘दसैंमा घर जान लामो तथा मझौला दूरीका अग्रिम टिकट बुकिङ खुला हुने हुँदा त्यस्ता स्थानमा यात्रुको भिडभाड र हुनसक्ने समस्यालाई समाधान गर्न कक्ष सञ्चालन गरिएको हो,’ उनले भने ।