काठमाडौँ- जिम्बाब्वेमा जारी आईसीसी पुरुष क्रिकेट विश्वकप छनोटअन्तर्गत नेपालले तेस्रो खेलमा बिहीबार टेस्ट राष्ट्र वेस्ट इन्डिजविरुद्ध पराजय भोग्यो । समूह ‘ए’ अन्तर्गतको खेलमा नेपालले वेस्ट इन्डिजसँग १ सय १ रनको पराजय भोगेको थियो ।

वेस्ट इन्डिजका लागि कप्तान शाई होपले १ सय ३२ रन तथा निकोलास पुरनले १ सय १५ रन बनाएका थिए ।

त्यसैगरी, नेपालले ३ सय ४० रनको लक्ष्य पछ्याउने क्रममा नेपाल २ सय ३८ रनमा अलआउट हुँदा वेस्ट इन्डजका बलर जासोन होल्डरले सर्वाधिक ३ विकेट हात पारेका थिए ।

तर नेपालसँगको खेलपछि वेस्ट इन्डिजका खेलाडीहरुले भने नेपाली खेलाडीहरुसँग आफ्नो अनुभव साटेका छन् । खासगरी शतक प्रहार गरेका तथा कप्तान शाई होप र सर्वाधिक विकेट हात पारेका जासोन होल्डरले नेपाली खेलाडीहरुसँग मैदानमै आफ्नो अनुभव साटेका थिए ।

त्यसको तस्बिर वेस्ट इन्डिज क्रिकेट टिमले सामाजिक सञ्जालमा समेत राखेका छन् ।