नेप्सेले नयाँ रेकर्ड बनायो, इण्डेक्स २,६५७.६१ बिन्दूमा

काठमाडौँः नेपाल स्टक एक्स्चेन्ज (नेप्से) परिसूचकले डेढ महिनाको अन्तरालमा नयाँ रेकर्ड बनाउँदै आइतबार २,६५७.६१ बिन्दूमा पुगेको छ । यो साता कारोबारको पहिलो दिन नेप्से परिसूचक २५.७१ अंक अर्थात् ०.९८ प्रतिशतले बढेर नयाँ रेकर्ड बनाएको हो । यसअघि फागुन ९ मा नेप्से २,६४०.३५ बिन्दूमा पुगेपछि बजार करेक्सन हुने र बढ्ने क्रममा इण्डेक्स उच्चतम बिन्दूभन्दा तल नै रहँदै आएको थियो । 

चैत ११ पछि बजार पुनः बढ्ने क्रममा देखियो र त्यसको दशौं दिनमा पुरानो रेकर्ड तोडिएको छ । यो अवधिमा बजार सम्हालिएर अगाडि बढेको देखिन्छ । नेप्सेमा आइतबार कारोबार रकम पनि ८ अर्ब ६७ करोड रुपैयाँ पुगेको छ । कारोबार रकम भने यसअघि नै दैनिक ९ अर्ब रुपैयाँ नाघिसकेको छ । गत साता बिहीबार बजार बन्द हुँदा नै नेप्से परिसूचक यसअघिको उच्चतम बिन्दूबाट ८.४५ अंक तल अर्थात् २,६३१.८९ बिन्दूमा रोकिएको थियो । आइतबार बजार सामान्य बढ्दा पनि यसअघिको रेकर्ड ‘ब्रेक’ भएको हो ।

---

आइतबार निर्जीवन बीमा कम्पनी, वित्त समूह र अन्य समूहका परिसूचकमा बढोत्तरीले नेप्से परिसूचकले पुरानो रेकर्ड पछि पार्न सम्भव भएको हो । यद्यपि ट्रेडिङ, होटल एण्ड टुरिजम, म्यानुफ्याक्चरिङ एण्ड प्रडक्सन, म्युअल फण्ड र इन्भेष्टमेन्ट बाहेक सबै समूहका परिसूचक उकालो लागेका छन् । 

आइतबार वोमी माइक्रोफाइनान्स, जनरल इन्स्योरेन्स कम्पनी, राधी विधुत कम्पनी, आइएमई जनरल इन्स्योरेन्स, एनआइसी एसिया लघुवित्त वित्तीय संस्था, सानिमा जनरल इन्स्योरेन्स लिमिटेड, साञ्जेन जलविधुत कम्पनी लिमिटेडको सेयर मूल्य ९ प्रतिशतभन्दा धेरै बढेको छ । आइतबार नेप्सेमा सबैभन्दा बढी कारोबार रकम ४७ करोड ५६ लाख ९९ हजार रुपैयाँ मूल्यका नेपाल इन्फ्रास्ट्रक्चर बैंक (निफ्रा)को आठ लाख १४ हजार सात सय ९५ कित्ता सेयर कारोबार भएको छ । त्यस्तै अपर तामाकोसीको २८ करोड ४१ लाख र नेपाल पुनर्बीमा कम्पनीको २६ करोड ८२ लाख रुपैयाँ मूल्यको सेयर कारोबार भएको छ । 

आइतबार नेप्सेमा दुई सय १२ कम्पनीको ८ अर्ब ६७ करोड १६ लाख रुपैयाँ मूल्यका एक करोड ७१ लाख २० हजार सात सय ३२ कित्ता सेयर ८६ हजार तीन सय २४ करोबारमार्फत् किनबेच भएको छ ।