विमान दुर्घटना : माछापुच्छ्रेको काभ्रे गाउँ शोकमा
कास्की - काठमाडौँबाट पोखरा आउँदै गरेको यती एयरलाइन्सको विमान दुर्घटनाले कास्कीको माछापुच्छ्रे गाउँपालिका–२ को काभ्रे गाउँ शोकमा डुबेको छ ।
पोखरामा आइतबार भएको विमान दुर्घटनामा विमानमा सवार काभ्रे गाउँका बेलमान गुरुङ र उनका धर्मपत्नी सीता गुरुङको निधनले गाउँ शोकमा डुबेको हो ।
बेलमान गत साउनमा मौसमी भिसामा बेलायत गएका थिए । उनी यही पुस २९ गते घर आउन काठमाडौँ आउनेभएपछि श्रीमती सीता सोही दिन काठमाडौँ पुगेका थिए।
उनीहरू दुवै जना यतीको विमानमार्फत पोखरा आउँदै गरेको र दुर्घटनामा परेको माछापुच्छ्रे–२ का वडाध्यक्ष एवं गाउँपालिकाका प्रवक्ता गणेश आचार्यले बताए । उनका अनुसार बेलमान दम्पतीले बिहान ११ बजेको यतीको अर्को जहाजको टिकट लिए पनि बोर्डिङ पास लिइसकेको र अघिल्लो जहाजमा सिट खाली रहेकाले सोही जहाज चढेका थिए ।
वडाध्यक्ष आचार्यले दुर्घटनाको खबर लगत्तै गाउँ शोकमा डुबेको बताए ।
बेलमान बेलायत जानुअघि गाउँमै रेष्टुरेण्ट सञ्चालन गर्थे । उनी विदेशिएपछि सीताले रेष्टेुरेन्ट सञ्चालन गर्दै आएकी थिइन् । बेलमानका बुबा इन्द्रबहादुर गुरुङ नेपाली कांग्रेस वडाका पूर्वसभापति हुन् ।
इन्द्रबहादुरको परिवारमा परेको शोकले सबै दुःखित बनेको वडाध्यक्ष आचार्यले बताए । स्व गुरुङका दुई छोरी र एक छोरा छन् । विमान दुर्घटनामा परी माछापुच्छ्रे गाउँपालिका–७ का शिवकुमार गुरुङको पनि निधन भएको बताइएको छ ।
काठमाडौँबाट पोखराका लागि उडेको यतीको एटिआर विमान पोखरा विमानस्थलमा अवतरणको केही मिनेटमात्र बाँकी छँदा विमानस्थल नजिकै सेती नदी खोँचमा दुर्घटनामा परेको थियो ।
विमानमा चालकदलका चार र ६८ यात्रु गरी ७२ जना सवार थिए ।
कमेन्ट गर्नुहोस्
Sign in with
Facebook Googleकमेन्ट पढ्नुहोस्
0 प्रतिकृया