काठमाडौं : नेपाल प्रहरीले सप्तरीको शम्भुनाथ नगरपालिका-२ भलुवाहीबाट १ थान एकनाले भरुवा बन्दुक सहित २ जनालाई शनिबार राति पक्राउ गरेको छ । पक्राउ पर्नेहरूमा २५ वर्षीय रामपुकार माझी र २२ वर्षीय रामस्वरुप मण्डल रहेको प्रहरीले जनाएको छ । इलाका प्रहरी कार्यालय रुपनीबाट खटिएको प्रहरीले बन्दुकसहित फेला पारी उनीहरूलाई पक्राउ गरेको हो ।

त्यस्तै प्रहरीले कपिलवस्तु, वाणगंगा नगरपालिका-७ मोतीपुर धैरेनी डाँडाबाट २ थान एकनाले भरुवा बन्दुक शनिबार बिहान बरामद गरेको जनाएको छ । इलाका प्रहरी कार्यालय पिपराबाट खटिएको प्रहरीले बेबारिसे अवस्थामा बन्दुक बरामद गरेको हो ।

गोरखा, पालुङटार नगरपालिका-५ चिनियाखर्कबाट १ थान एकनाले भरुवा बन्दुक शनिबार साँझ प्रहरीले बरामद गरेको छ । अस्थाई प्रहरी पोष्ट च्याङ्लीबाट खटिएको प्रहरीले सोही ठाउँस्थित मधुवन सामुदायिक जंगलमा बन्दुक बेवारिसे अवस्थामा बरामद गरेको हो । यस सम्बन्धमा स्थानीय प्रहरीले थप अनुसन्धान गरिरहेको छ ।