काठमाडौँ : लिभरपुल प्रिमियर लिगमा लगातार पाँच खेलमा जितविहिन छ । अंग्रेजी नयाँ वर्षमा तीन खेलमध्ये दुईमा पराजय भोगेको छ भने एक गोल पनि गर्न सकेको छैन । गत सिजन लिग जितेको लिभरपुलका स्टार फरवार्डहरू फिक्का देखिएका छन् । गोल गर्नमा चुकिरहेका छन् ।

मोहम्मद सलाहले पछिल्ला पाँच लिग खेलमा न त गोल गरेका छन्, न त असिस्ट नै दर्ता गरेका छन् । रोर्बटो फिरमिन्होको हालत पनि फरक छैन । गत डिसेम्बरमा क्रिस्टल प्यालेसविरुद्ध दुई गोल गरेका ब्राजिलियन स्ट्राइकरले त्यसयता कुनै पनि खेलमा गोल वा असिस्टको योगदान गरेका छैनन् ।

लिभरपुलका लागि कठिन समयमा गोल गर्ने साडियो माने पनि लगातार चुकिरहेका छन् । वेस्टब्रुमसँगको बराबरीमा गोल गरेको मानेले पछिल्ला चार खेलमा गोलको खुशीयाली मनाउन पाएका छन् ।

लिभरपुलको पछिल्ला सफलतामा महत्वपूर्ण साबित भएका फरवार्डहरू सुस्ताउँदा उनीहरूको आलोचना हुन थालेको छ । गोल गर्न सजिला मौका गुमाइरहेका उनीहरू बिहीबार बर्नलीविरुद्धको खेलमा पनि कमजोर देखिए ।

यसै विषयमा लिभरपुुलका पूर्व खेलाडी जोन अल्ड्रिजको भनाई सार्वजनिक भएको छ । सन् ८० को दशकमा लिभरपुलका लागि ८३ खेलमा ५३ गोल गरेका अल्ड्रिजले लिभरपुलका स्टार फरवार्डहरूले आलोचना सहनुपर्ने प्रतिक्रिया दिएका हुन् ।

‘लिभरपुलको अग्रपंक्तिमा खेल्ने तीन खेलाडीहरूले आलोचना भोगिरहेका छन् । उनीहरूलाई आलोचना गर्नु जायज छ । उनीहरूलाई लिभरपुलले गोल गर्नका लागि ठूलो रकम तलब स्वरुप तिरिरहेको छ । तर ती खेलाडीहरू आफ्नो काममा असफल हुँदै गइरहेका छन् ।’ अल्ड्रिजले स्थानिय लिभरपुल इकोसँगको अन्तवार्तामा भने ।

सबै खेलमा गोल गर्न नसके पनि सलाह, फिरमिन्हो र मानेले कमसेकम एक खेल बिराएर गोल गर्नुपर्ने धारणा राखे । ‘हामी लिभरपुलको रक्षापंक्तिको बारेमा चिन्नतित थियौं । बरु अग्रपंक्तिले खराब खेल देखाइरहेको छ । अग्रपंक्तिका खेलाडीहरूको आर्कषण नै हरायो' अल्ड्रिजको भनाई थियो ।