कियरा आडवानी यतिबेला ‘लक्ष्मी’को प्रचार प्रसार गरिरहेकी छिन् । फिल्म यही ९ तारिखमा डिज्नेमा आउँदैछ । तर, यसका मुख्य कलाकार अक्षय कुमार र कियरा आडवानीले हलमा आउनेभन्दा कम प्रचार गरेका छैनन् । प्रचारकै क्रममा अक्षय र कियरा कपिल शर्माको सोमा गएका थिए ।

कपिलको सोमा हिरोइन पुगेपछि नजिस्काउने कुरै भएन । कपिलले जिस्काउँदै कियराको ‘रिलेसनसिप स्ट्याटस’को बारेमा सोधे । जवाफमा कियराले यो विषयमा विवाहपछि मात्र बोल्ने बताइन् । उनको जवाफ थियो, ‘म त्यतिबेला मात्र यो विषयमा कुरा गर्छु जब विवाह गर्छु ।

कपिलले स्मार्ट उत्तर दिएको भन्दै कियराको तारिफ गरे । तर, यो कुरा यहीँ टुंगिएन । अक्षय कुमारले कियराको तारिफ गर्दा गर्दै उनको अफेयरको पोल खोलिदिए । उनले कियरालाई जिस्काउँदै भने, ‘कियरा बडा सिद्धान्तवाली छिन् ।’
अक्षयको यो प्रतिक्रिया सुनेर कपिलसँगै सारा टिम हाँसे । कियराको गाला लाजले रातो भयो ।

केही समययता कियरा सिद्धार्थ मल्होत्रासँग अफेयरमा रहेको चर्चा छ । पापाराजीले धेरै पटक दुवैलाई सँगै कैद गरिसकेका छन् । तर, मुखले दुवैले आजसम्म पनि अफेयरको खबर स्वीकारेका छैनन् । सिद्धार्थको नाम यसअघि  आलिया भट्टसँग जोडिने गरेको थियो ।