लकडाउन अवधिका शुल्क नलिन विद्यालय सञ्चालकलाई सांसद यादवको आग्रह
पर्सा : पर्सा क्षेत्र नम्बर १ का प्रतिनिधि सभा सदस्य प्रदीप यादवले लकडाउन अवधिभरको शुल्क नलिन नीजि विद्यालय सञ्चालकलाई आग्रह गरेका छन् । कोभिड-१९ को माहामारीका कारण लामो समय देखी बन्द रहेका विद्यालय र पढ्न नपाएका बालबालिका दुवै प्रभावित भएको भन्दै उनले विद्यार्थीका अभिभावकहरुलाई तनाब सिर्जना हुने गरी शुल्क नलिन आग्रह गरेका हुन् ।
सांसद यादवको उपस्थितिमा आइतबार बसेको बैठकमा निजी तथा आवासीय विद्यालय अर्गनाइजेसन (प्याब्सन) र एन प्याब्सन पर्साले सरकारको निर्णय कार्यान्वयनका लागि ३ बुँदे प्रस्तावसमेत राखेका छन् ।
प्याब्सन पर्साका अध्यक्ष हरिशंकरप्रसाद साह तथा एन-प्याब्सनका अध्यक्ष रामसुन्दर चौधरीको संयुक्त अध्यक्षतामा बसेको बैठकमा विद्यालयका सञ्चालकहरूले, लकडाउन अवधिभर विद्यालयलाई पुगेको क्षति, शुल्क मिनाह तथा विविध समस्याको सम्बन्धमा सरकारको निर्णय कार्यान्वयन गर्न ३ बुँदे प्रस्ताव रादिएको हो ।
सांसद यादवले तीन बुँदे प्रस्ताव सरोकारवाला निकायसम्म पुर्याएर निर्णय गराउन पहल गर्ने बताएका छन् ।
