मन्त्री किरातीलाई बर्खास्त गरेर कारबाही गर्न राप्रपाको माग

काठमाडौँ- राप्रपाले धर्मसँग सम्बन्धित विवादास्पद अभिव्यक्ति दिने संस्कृति, पर्यटन तथा नागरिक उड्डयनमन्त्री सुदन किरातीलाई मन्त्रीबाट बर्खास्त गरेर कारबाही गर्न माग गरेको छ । 

बुधबार आयोजित एक सार्वजनिक कार्यक्रममा मन्त्री किरातीले ‘क्रिश्चियन धर्मको विरोध गर्नु भनेको संविधानको विरोध गर्नु हो र क्रिश्चियनको विरोध गर्नेलाई हतकडी लगाउने’ भन्दै विवादास्पद अभिव्यक्ति दिएका थिए । सोही अभिव्यक्तिलाई लिएर राप्रपाले मन्त्री किरातीलाई बर्खास्त गरेर कारबाही गर्न प्रधानमन्त्री पुष्पकमल दाहाल 'प्रचण्ड' र सत्तारूढ गठबन्धनको ध्यानाकर्षण गराएको हो । 

---

सामाजिक सञ्जालमार्फत राप्रपा प्रवक्ता तथा प्रचार विभाग प्रमुख मोहन श्रेष्ठले हिन्दु धर्म, हिन्दु संवेदनामाथि अशोभनीय र अमर्यादित टिप्पणी गर्ने मन्त्री सुदन किराती बर्खास्त गरेर कारबाही गर्न माग गरेका हुन् । 

८१ प्रतिशत हिन्दु र ९४ प्रतिशत ओमकार परिवार भएको देशका  संस्कृति मन्त्रीको रुपमा आएको उक्त अभिव्यक्ति अस्वीकार्य रहेको भन्दै उनले तत्काल उनलाई पदमुक्त गराउन र कारबाही गर्न माग गरेका हुन् । 

‘मन्त्री पदमा रहेर ‘कृश्चियन धर्म नमान्नेलाई जेलमा कोच्ने’ जस्तो बहुलठ्ठीपूर्ण अभिव्यक्ति दिने, हिन्दु धर्म, हिन्दु संवेदनामाथि अशोभनीय र अमर्यादित टिप्पणी गर्ने प्रचण्ड सरकारका मन्त्री सुदन किराती बर्खास्तका योग्य छन् । यस्तो व्यक्ति ८१ प्रतिशत  हिन्दु र ९४ प्रतिशत ओमकार परिवार भएको देशमा कसरी संस्कृतिमन्त्रीको रूपमा निरन्तर र स्विकार्य हुनसक्छन् ?’ प्रवक्ता श्रेष्ठले भने, ‘निजलाई पदमुक्त गराउन प्रधानमन्त्री र सत्तागठबन्धनको ध्यानाकर्षण गराउँदछौं । साथै, सामाजिक सद्‌भाव बिथोल्ने, साम्प्रदायिक विद्वेष फैलाउने निजलाई कानुन बमोजिम कारबाही गरियोस् ।’