महामन्त्री थापाको प्रतिवेदन : आगामी निर्वाचनहरू एक्लै लड्ने, मतदातालाई 'रुख' मै मत हाल्न लगाउने

काठमाडौँ- नेपाली कांग्रेसका महामन्त्री गगन थापाले भविष्यमा हुने आवाधिक निर्वाचनहरू आफ्नै तागतमा एक्लै लड्ने सुनिश्चिततासहितको सांगठनिक प्रतिवेदन प्रस्तुत पेस गरेका छन् ।

ललितपुरमा जारी महासमिति बैठकमा थापाले पेस गरेको प्रतिवेदनमा आगामी निर्वाचनहरू आफ्नै तागतमा एक्लै लड्ने र आफ्ना मतदातालाई कांग्रेसको चुनाव चिह्न 'रुख' मा नै मत हाल्न पाउने अवस्था सुनिश्चित गर्ने उल्लेख गरिएको छ । उनको प्रतिवेदनमा निर्वाचनपूर्व गठबन्धन गर्दा पार्टीले एक्लै चुनाव लड्दा जस्तो कार्यकर्तामा विजयको भाव र उत्साह नआउने अनुभव सिकाएको उल्लेख छ ।

---

पार्टीको आफ्नो उम्मेदवार नहुँदा संगठनभित्र आकांक्षीको व्यवस्थापन कठिन भएको पार्टीभित्रको ऊर्जामा समेत गिरावट आएको तथा निर्वाचनमा संख्यात्मक रूपमा पार्टी पहिलो दल भए पनि लोकप्रिय मत घट्ने अवस्था आएको उनले बताए ।

त्यस्तै उनले सरकार र पार्टीबीच समन्वय, सहयोग र सहजीकरण सही ढङ्गले नहुँदा एक-अर्कालाई बुझ्ने कुरामा नै समस्या भएको र सरकारले गरेका कामको पार्टीबाट यथोचित प्रचार हुन नसकेको जिकिर गरे । संघ, प्रदेश र बहुसंख्यक स्थानीय सरकारमा पार्टी नेतृत्वदायी भूमिकामा भएता पनि पार्टी सरकारमा भएको महसुस र आफ्नोपन नै कांग्रेस सदस्यले गर्न नसकिएको गुनासो रहेको उनले उल्लेख गरेका छन् ।

महामन्त्री थापाको प्रतिवेदनमा बहुमत भएकाले फरक मत राख्नेलाई बेवास्ता गर्ने, पराजितले जितेकोलाई असहयोग गर्ने प्रवृत्तिले अन्ततः संगठनलाई नै कमजोर बनाएको र  विधानसम्मत थिति र विधिमा पार्टी संचालन कसरी गर्ने भन्ने विषय आजको ठूलो चुनौतीको रूपमा रहेको उल्लेख छ । उनले यस वर्षदेखि सबै तहमा हरेक वर्ष अनिवार्य सम्मेलन गर्ने अभ्यासको थालनी भएको र यस वर्ष हालसम्म ४ वटा प्रदेश सम्मेलन, ६० वटा जिल्ला सम्मेलन र १०० बढी प्रतिनिधिसभा क्षेत्रीय सम्मेलन सम्पन्न भइसकेको जानकारी गराएका छन् ।

१४औं महाधिवेशनसम्मको क्रियाशील सदस्यताको समस्या समाधान गरी ८ लाख ६९ हजार ५५१ क्रियाशील सदस्यताको विवरण जिल्लागत रूपमा सबै जिल्लामा पठाएर नवीकरणको प्रक्रिया सुरु भइसकेको उनको प्रतिवेदनमा उल्लेख छ ।