काठमाडौँ : फ्रेन्च क्लब पेरिस सेन्ट जर्मेन (पीएसजी)सँग सम्झौता गर्न मेस्सी पेरिस हिडेपछि बार्सिलोनाले रंगशालाभित्र र बाहिर राखिएका उनका पोस्टर उप्काउन थालेको छ । मेस्सीले २१ वर्ष खेलेर नयाँ बार्सिलोनालाई नयाँ उचाईमा पुर्याएपनि उनले बार्सिलोना छाडेसँगै पोस्टर उप्काउन थालेको हो । मंगलबार मेस्सी पेरिसका लागि उडेका छन् ।

जहाँ उनले पीएसजीसँगको दुई वर्षे सम्झौतापत्रमा हस्ताक्षर गर्नुका साथै मेडिकल जाँच गरेर बुधबार सार्वजनिक हुने तयारी छ । बार्सिलोनाले क्लब छाडेका खेलाडीको पोस्टर उप्काएर अर्को खेलाडीको पोस्टर टाँस्ने गर्दछ । 

गएको वर्ष मात्रै लुइस स्वारेज र इभान राकिटिकको पोस्टर उप्काएको बार्सिलोनाले यसपटक मेस्सीको पोस्टर उप्काएको हो । सन् २०१७ मा नेयमार महंगो मूल्यमा पीएसजी गएपछि बार्सिलोनाले उनको पोस्टर उप्काएको थियो ।