काठमाडौँ : इंग्लिस प्रिमियर लिग फुटबलमा म्यानचेस्टर सिटीले फराकिलो अग्रता लिएको छ । मंगलबार राती भएको खेलमा सिटीले ओल्भ्सलाई ४–१ गोल अन्तरले हराउँदै फराकिलो अग्रता बनाएको हो ।

सिटीलाई जिताउन गाब्रियल जिससले दुई र रियाद मेहराजले एक गोल गरे । ओल्भ्सका लेन्डर डेन्डोक्नरले आत्मघाती गोल गर्दा कोनोर कोएडीले एक गोल फर्काए । आत्मघाती गोल गरेपनि खेल बराबरी उन्मुख भएका बेला सिटीले अन्तिम १३ मिनेटमा तीन गोल गरेर प्रभावशाली जित दर्ता गराएको हो ।

जितसँगै सिटी २७ खेलबाट ६५ अंकसहित लिगको शीर्ष स्थानमा छ । एक खेल कम खेलेको दोस्रो स्थानको म्यानचेस्टर युनाईटेडको ५० अंक छ ।