लसएन्जल्स :  पहिलो भागको सफलतासँगै दोस्रो भाग पनि खेल्ने कलाकारले पारिश्रमिक दोब्बर बनाउँछन् । तर, जब रबर्ट प्याटिसनले ‘ब्याट मेन’ सिरिज खेल्ने निर्णय गरे यतिबेला नै डिसीले उनलाई मागेजति रकम दिएको थियो । दोस्रो भागमा भने यो रकम चार गुणा बढ्ने भएको छ । 

पहिलो भागमा उनले ५ मिलियन डलर अर्थात् ६० करोड नेपाली रुपैंया बराबर पारिश्रमिक लिएका थिए ।  दोस्रो भागमा भने उनलाई स्टुडियोले २० मिलियन अर्थात् २ अर्ब ३७ करोड हाराहारीको रकम तिर्ने भएको छ । 

रबर्टले पाउन लागेको यो रकम कुनै पनि सुपरहिरो फ्रेन्जाइज हिरोले लिएको मध्ये दोस्रो हो । यही सिरिजका दुई फिल्मबाट क्रिश्चियन बेलले लगभग ४० मिलियन डलर लिएका थिए । क्रिस्टोफर नोलान निर्देशित ‘ब्याटमेन’को पहिलो भागबाट ९ मिलियन र दोस्रोबाट ३० गरी बेलले सुपरहिरो फिल्मबाट सर्वाधिक पारिश्रमिक लिने कीर्तिमान कायम गरेका छन् । 

रबर्टले लिएको रकम ‘आन्टमेन’का रबर्ड डाउनी जुनियर, ‘थोर’का क्रिस हेम्सवर्थ र ‘क्याप्टेन अमेरिका’का क्रिस इभान्सले लिए भन्दा अत्यधिक धेरै हो ।  रबर्टलाई यो रकम पूर्व रिलिज फिल्मको सफलतालाई आधार मानेर दिन लागिएको बताइएको छ । क्रिस्टोफर निर्देशित ‘ब्याटमेन’ले बक्स अफिसमा राम्रै पैसा झारेको थियो । रबर्ट अभिनीत ‘ब्याटमेन’ आउँदो वर्षको मार्च ४मा रिलिज हुने कार्यतालिका छ ।