कञ्चनपुर-  बिहीबार कञ्चनपुरको भीमदत्त नगरपालिका–१ को वडा कार्यालयमा ज्येष्ठ नागरिक भरिभराउ थिए । सत्तरी वर्षदेखि शतक पुगेका वृद्धवृद्धा कुनै सामाजिक या अन्य कुनै भत्ता बुझ्न भने पक्कै होइनन् । उनीहरूसँगै वडाले बनाएको मापदण्डअनुसार पूर्ण अपाङ्गता भएका २० जना स्थानीयसमेत वडा कार्यालयमा जम्मा भएका थिए । यसरी वडा कार्यालयमा जम्मा हुनुको कारण थियो, वडाध्यक्ष आसेफ कुवँर (भुन्टू)को मनकारी निर्णय ।

विसं २०७४ मा वडाध्यक्षमा पहिलोपटक निर्वाचनमा होमिनुअघि नै आफूले वडाबाट पाउने पारिश्रमिकलगायत अन्य सुविधा वडामै खर्चिने घोषणा गरेका कुवँरले निर्वाचन दोस्रोपटक जितेयता ज्येष्ठ नागरिक र अपाङ्गता भएका व्यक्तिको दैनिक खर्चका लागि पारिश्रमिक रकम वितरण गर्दै आएका छन् । 

यसका लागि वडाका एक सय ४१ ज्येष्ठ नागरिक र २० जना पूर्ण अपाङ्गता भएका व्यक्ति आज वडा कार्यालयमा जम्मा भएका हुन् । वडाध्यक्ष कुँवरले ज्येष्ठ नागरिक र अपाङ्गता भएकालाई प्रतिव्यक्ति रु एक हजार पाँच सयका दरले सहयोग वितरण गरेका छन् । आफूले वार्षिकरूपमा पाएको रु दुई लाख ४१ हजार पाँच सय नगद रकम वडामा वितरण गरेको उनले जानकारी दिए । “निर्वाचनअघि घोषणा गरेयता विगत छ वर्षदेखि निरन्तर पारिश्रमिक बस्तीमै वितरण गर्दै आएको छु”, वडाध्यक्ष कुँवरले भने, “यो एउटा सानो कामले वडाका ज्येष्ठ नागरिकमा खुसीयाली नै पाएका छौँ ।”

त्यसैगरी वडाध्यक्षले वितरण गरेको रकम लिँदै वडाका एक सय वर्षीय गम्भीरसिंह चैसिरले खुसी व्यक्त गरे । “रकम कति दिए ठूलो कुरो नहुन सक्छ”, चैसिरले भने, “हामी पनि हाम्रो वडाध्यक्ष जत्तिको मनकारी जनप्रतिनिधि पाएकामा गर्व गर्छौँ ।” उनले वडाभरिका ज्येष्ठ नागरिक वडाध्यक्षको कामप्रति सन्तुष्ट रहेको बताए । वडामा रकम वितरण गरिरहँदा ज्येष्ठ नागरिकले खुसीका आँशुमात्रै झारेनन् । वडाध्यक्ष कुँवरलाई फूलमालाले स्वागत गर्दै आशीर्वाद पनि दिइरहे ।  अठासी स्थानीय तह रहेको सुदूरपश्चिममा पहिलोपटक आफूले पाएको पारिश्रमिक वडाकै नागरिकलाई वितरण गर्दै आएका कुवँरले अहिले मासिक रु २२ हजार पारिश्रमिक पाउने गरेको बताए । 

“सुरुमा रकम वितरण गर्दा मासिक पारिश्रमिक रु १७ हजार हाराहारी थियो”, उनले भने, “छ वर्षपछि आइपुग्दा रु २२ हजार पुगेको छ ।” उनले ज्येष्ठ नागरिकको साथ र सहयोगले नै आफू दोस्रोपटक वडामा भारी मतान्तरले विजयी भएको बताए । “वडाको सम्रग विकास र बजेट ल्याउने विषयमा पनि केन्द्रसम्म पहल गर्दै आएको छु”, नले भने, “जनप्रतिनिधिले जनताको सेवा गर्ने हो, सुविधा लिने होइन ।” उनले दोसो कार्यकालसम्म आइपुग्दा वडामा रु १२ लाखभन्दा बढी रकम वितरण गरिसकेको बताए । 

“रकम लिन छुटेकालाई घरमै गएर पनि वितरण गर्छु”, उनले भने, “वडाध्यक्ष रहँदासम्म पारिश्रमिक लिन्न ।” दसैँको मुखमा वडाध्यक्षबाट नयाँ नोट पाएपछि हर्षित देखिनुभएका वडाका ९८ वर्षीया पार्वतीदेवी पाण्डेयले वडाध्यक्ष कुँवरले गरेको असल काम अरु जनप्रतिनिधिले पनि सिक्नुपर्ने बताए । “हरेक वर्ष वडाध्यक्ष बाबुले दिएको रकमले सामान्य फलफूल खर्च भएपनि चलेको छ”, उनले भने, “सामान्य औषधिमुलो पनि यहाँबाट चल्दा खुसी नहुने को होला र ?”
रासस