संसदको चालु अधिवेशनमा धेरै वटा कानुन बन्छ : मन्त्री शर्मा
काठमाडौँ - कानुन, न्याय तथा संसदीय मामिला मन्त्री गोविन्द प्रसाद शर्माले संसदको चालु अधिवेशनमा धेरै वटा कानुन बनाइने बताएका छन् ।
शुक्रबार प्रतिनिधि सभाको बैठक पछि सञ्चारकर्मीलाई संक्षिप्त प्रतिक्रिया दिदैँ मन्त्री शर्माले संसदको चालु अधिवेशनमा धेरै वटा कानुन बनाइने बताएका हुन् ।
उनले सहमति जुटेका कानुनहरु अगाडि बढाउने बताए । संसदमा अहिले ५३ वटा विधेयकहरु रहेको र ८ वटा अध्यादेशहरूको प्रतिस्थापन विधेयक ल्याइएको पनि उनले जानकारी दिए ।
उनले भने, ‘हामीसँग ५३ वटा विधेयकहरु पार्लियामेन्टमा छन् । ८ वटा अध्यादेशहरूको प्रतिस्थापन विधेयक हामीले लिएर आएका छौँ । यही अधिवेशनमा नै अरु केही कानुनहरु ल्याउनुपर्नेछ । यद्यपि यो बजेट अधिवेशन भएतापनि यो विधेयक अधिवेशन जस्तै यसमा हामी बाँकी रहेका कानुन र सहमति जुटेका कानुनहरु अगाडि बढाएर लिएर जान्छौँ र धेरै वटा कानुन यो चोटी बन्छ ।’
उनले संस्कृति, पर्यटन तथा नागरिक उड्डयन मन्त्री प्रेम बहादुर आलेले नेपाल एयरलाइन्सका अध्यक्ष युवराज अधिकारीमाथि गाली गलौज र हातपात गरेको समाचार बाहिरिएको सम्बन्धमा छानविन हुनुपर्ने बताए ।
उनले गल्ती गर्नेहरु कानुनी दायरामा आउनुपर्ने बताए । उनले भने – ‘पहिला त त्यो गतिविधि के हो भन्ने कुरा छानविन हुनुप¥यो । सामाजिक सञ्जालमा आएको सबैकुरा के हो भन्ने कुरा यसको पहिलो शर्त भनेको छानविन हुनुपर्छ । कसैले गल्ती गर्छ भने त्यो कानुनको दायरामा आउनुपर्छ । तर गरेको छ कि छैन भन्ने कुरा चाहीँ त्यत्तिकै थाहा हुँदैन । यसमा मन्त्रीको भनाई के छ त्यो पनि बुझ्नुपर्ने हुन्छ । बाहिर आएको कुरा सत्य हो कि होइन यकिन गर्नुपर्ने हुन्छ । त्यो एकिन भइसकेपछि यस्तो यदि भएको हो भने त्यो हुनुहँुदैन । कानुनको दायरामा आउनैपर्छ ।’
