काठमाडौं–स्वास्थ्य तथा जनसंख्या मन्त्री विरोध खतिवडाले हाल पालिका र वडा स्तरमा बनिरहेका अस्पतालहरूको निर्माणको काम नरोकिने बताएका छन् । मन्त्रालयको विनियोजित बजेटको छलफलमा सांसदहरूले उठाएको प्रश्नको जवाफ दिँदै मन्त्री खतिवडाले यस्तो जवाफ दिएका हुन् । 

‘मन्त्रालयले तोकेको कार्यविधि, जमिनका कुरा, डीपीआरका कुरा, पालिकामा हुनुपर्ने आवश्यक निर्णयहरू तपाईहरूले गरेर ल्याउनुभयो भने पालिका र वडास्तरका अस्पताल  निर्माणका कामहरू अगाडि बढ्छ ,’ उनले भने, ‘ती काम रोकिदैनन् ।’

उनले पालिका स्तरका ५,१० र १५ बेडका  आधारभूत अस्पताल बनाउन मन्त्रालयले १० अर्ब छुट्याइसकेको पनि बताए । ‘धेरै मान्यजीरूले अस्पताल निर्माणसँग गाँसिएका प्रश्न धेरै गर्नुभयो,’ उनले भने, ‘पालिकास्तरका अस्पताल ५, १० र १५ बेडको र वडा स्तरको आधारभूत अस्पताल बजेटमा पनि ती कार्यक्रम निरन्तर छ भनिएको थियो । यसको लागि १० अर्ब रुपैयाँ छुट्याइएको छ । अपुग भएमा थप बजेट निकासान हुने कुरा अर्थमन्त्रीजीले आश्वस्त पार्नुभएको छ ।’