सिन्धुपाल्चोक–देश सङ्घीयतामा गएपछि यहाँका नागरिकले घरदैलोमै सरकार पुगेको आभास पाएका छन् । कतिपय स्थानीय तहले उदाहरणीय काम गरेर देखाएका पनि छन् । तीमध्ये सिन्धुपाल्चोकको इन्द्रावती गाउँपालिका एउटा उदाहरणीय स्थानीय तह बन्न पुगेको छ ।

यो गाउँपालिका पछिल्लो दुई वर्ष जिल्लाकै उत्कृष्ट बन्यो । गाउँ कार्यपालिकाले गरेको कार्य सम्पादनका आधारमा इन्द्रावती अब्बल ठहरिएको हो । आन्तरिक मूल्यांकनमा यो वर्ष इन्द्रावतीले औसत अंक ७६.२५ प्रतिशत अंक प्राप्त गरेको थियो ।

उक्त गाउँपालिकाले जनभावनाअनुसार विभिन्न योजना तथा परियोजना सञ्चालन गर्दै आएको गाउँपालिकाका अध्यक्ष वंशलाल तामाङले बताए । गाउँपालिकाको कार्यपालिकामा आफ्नो अल्पमत भए पनि हालसम्म कुनै पनि विषयमा अवरोध सिर्जना नभएको आम नागरिकको मागअनुसार नै योजनाबद्व तरिकाले पालिकाले विकास र निर्माणका काम गर्दै आएको उनको भनाइ थियो ।     
     
हालसम्म सबै वडाका टोलटोलमा मोटर बाटो खन्ने, स्तरोन्नति गर्ने र कालोपत्रे गर्ने काम भइरहेकोे छ । विद्यतीकरणअन्तर्गत पालिका काठेपोल मुक्त गाउँपालिका घोषणाको अन्तिम तयारीमा छ भने पालिकाभित्र बसोबास गर्ने करिब २८ हजार भन्दाबढी नागरिकलाई स्वच्छ खानेपानी खाने उपलब्ध गराउन लागिएको छ     
     
स्वास्थ्य क्षेत्रमा पनि उल्लेखनीय काम भएको र गाउँपालिकाको प्रशासनिक भवनले उत्तिकै चर्चा पाइरहेको छ । प्यागोडाशैलीमा निर्माण गरिएको भवन सामाजिक सञ्जालका साथै विभिन्न सञ्चारमाध्यममा चर्चाको विषय बनेको हो । यसैगरी सबै वडा कार्यालयको भवन निर्माण भएर सेवा प्रवाह पनि हुन थालेको छ ।     
     
खेलकुदको विकासका लागि सबै वडामा एक वडा एक खेल मैदानको अवधारणा ल्याई सबै वडावासीले आफ्नै वडाको मैदानमा खेल्ने अवसर उपलब्ध गराउन केही वडामा खेल मैदान निर्माण भइसकेका र केही वडामा निर्माणको अन्तिम चरणमा पुगेको छ ।     
     
गाउँमै सुविधासम्पन्न अस्पताल     
     
गाउँपालिकामा एउटा व्यवस्थित अस्पताल नहुँदा स्थानीयवासीले स्वास्थ्यचौकीभन्दा माथिल्लो सेवा पाउन चौतारा, धुलिखेल या मेलम्ची पुग्नुपथ्र्यो । गाउँपालिकाले चार वर्षपछि इन्द्रावती गाउँपालिका–४ कै नवलपुर बजारमा १५ शय्याको अस्पताल निर्माण गरेपछि यो समस्या समाधान भएकाले स्थानीयवासी उत्साहित भएका छन् ।अस्पताल निर्माण पछि एक्सरे, रगत तथा स्वास्थ्य परीक्षण र औषधि खरिदका लागि चौतारा धाउनुपर्ने बाध्यता अन्त्य भएको छ । रु पाँच करोड ५१ लाखको लगानीमा न्यु ड्रागइन पवित्र मल्टिपल डेभिड कम्पनीले तीन रोपनी जमिनमा बनाएको अस्पतालमा ३५ कोठा र १५ बेड छ ।     
     
आकर्षक गाउँपालिका भवन     
     
गाउँपालिकाले आकर्षक गाउँपालिका भवन बनाएको छ। सबैजसो पालिकाको भवन सामान्य या आधुनिक शैलीमा निर्माण गरिए पनि यहाँ भने पुरातात्विक प्यागोडा शैलीमा भवन बनाइएको हो । सुनकोसी अर्थात् थकाह्युल्साको किराँतकालीन राज्यको इतिहास भएकाले पालिकाको भवन बनाउँदा पुरानै शैली अपनाइएको गाँउपालीकाका प्रमुख इन्जिनियर राजाराम घोरसैनीले बताए।     

छ करोड ५१ लाखको लागतमा बनेको सो भवन स्वराज–टक्सार जेभीले १८ महिनामा निर्माण गरेको र भवनमा प्रविधिमैत्री कक्ष, हेल्प डेस्क, बैठक कक्ष र पदाधिकारीका लागि छुट्टाछुट्टै कार्यकक्ष छन् ।जिल्लामा तीन वटा नगर र नौ वटा गाउँपालिका छन् । हालसम्म इन्द्रावतीसहित मेलम्ची, बाह्रबिसे र चौतारा साँगाचोकगढी नगरपालिका तथा लिशङ्खुपाखर, पाँचपोखरी थाङपाल, जुगल गाउँपालिकाले कार्यालय भवन निर्माण भइसकेका छन् । भोटेकोसी, बलेफी, त्रिपुरासुन्दरी, हेलम्बु गाउँपालिकाले भने केन्द्र निश्चित गरेर भवन बनाउँदै छन्     
     
प्रत्येक घरमा खानेपानी पुर्‍याइने     
     
गाउँपालिकामा खानेपानीको समस्या दीर्घकालीन रुपमा समाधान हुने भएको छ । पालिकाको वडा नं ४ देखि १२ सम्मका सबै बस्तीलाई समेटेर खानेपानी वितरण गर्न इन्द्रावती बृहत् खानेपानी आयोजना सुरू भएपश्चात् खानेपानीको समस्या समाधान हुने भएको हो ।     
     
उक्त आयोजनाका लागि हेटौँडास्थित सङ्घीय खानेपानी तथा ढल व्यवस्थापन आयोजनाले बोलपत्र आह्वान गरेर काम सुरू गरेको छ । सो आयोजना रु २० करोडभन्दा माथिको लगानीमा निर्माण थालिएको हो । उक्त आयोजनाबाट १३ हजारभन्दा बढी जनता लाभान्वित हुने र तोकिएको समयावधि अघि नै काम सम्पन्न हुने इन्जिनियर घोरसैनीले बताए।     

वडा नम्बर १ मा मुहान रहेको खानेपानी आफ्नो गाउँसम्म आउने भएपछि स्थानीयवासी खुसी भएका वडा नम्बर ५ निवासी सुनिल भट्टराईले बताए।     
     
भृकुटी पार्क     
     
गाउँपालिकामा भूकम्प स्मारक भृकुटी शान्ति पर्क निर्माण गर्न लागिएको छ । गाउँपालिकाका अध्यक्ष तामाङले उक्त पार्क शिलान्यासका अवसरमा यस गाउँपालिकालाई ऐतिहासिक रुपमा चिनाउनु नै गाउँपालिकाको पहिचान भएको बताए । यस्ता संरचना निर्माणले भावी पुस्तालाई अध्ययन, अनुसन्धान गर्ने ठाउँको रुपमा चिनाउन सकिने उनको भनाइ थियो ।     
     
गाउँपालिकाले अघि सारेको योजनामा उपलब्ध स्रोतलाई मध्यनजर गर्दै काम भइरहेको पनि अध्यक्ष तामाङले जानकारी दिए । पर्यटकीयस्थलअन्तर्गत पार्क बनाउन लागिएको र थामन ह्युल्साको रुपमा चिनिएको ठाउँलाई अब भृकुटी पार्कको रुपमा चिनाउने उनको भनाइ थियो ।     
     
राष्ट्रिय विभूति भृकुटीको विवाहमा यही बाटो प्रयोग गरेको किम्वदन्ती रहेको र हालसम्म प्राप्त अभिलेखको आधारमा पनि भृकुटी पार्क निर्माण गर्न लागिएको गाउँपालिकाले जनाएको छ । संस्कृति पर्यटन तथा नागरिक उड्डयन मन्त्रालयको ७० प्रतिशत र गाउँपालिकाको ३० प्रतिशत लागतमा सो पार्क निर्माण गर्न लागिएको हो । गाउँपालिकाको १० औँ गाउँसभाले सिपाघाट, ज्यामीरेमाने, नवलपुर ओखरेनी सडकमार्गलाई भृकुटी मार्ग नामकरण गरेको छ ।     
     
भूकम्प स्मारक निर्माण     
     
गाउँपालिकाको नवलपुरमा २०७२ सालको भूकम्पमा परी मृत्यु भएका गाउँवासीको सम्झनामा भूकम्प स्मृति पार्क निर्माण गरिएको छ । अध्यक्ष तामाङका अनुसार भूकम्पमा परी मृत्यु भएका गाउँबासीको नाम सो पार्कमा लेखिने छ । त्यसबखत भूकम्पमा परी ५०० ले ज्यान गुमाएका थिए । भूकम्पमा सिन्धुपाल्चोकबाट मात्रै तीन हजार ५०० भन्दा बढीले ज्यान गुमाएका थिए ।     
     
सबै वडा कार्यालयको आफ्नै भवन     

प्रत्येक वडाको आफ्नै कार्यालय भवन बनाइएको छ । खेल क्षेत्रबाट गाउँपालिकालाई चिनाउन रङ्गशाला निर्माण अन्तिम चरणमा पुगेको छ । पालिकाभित्र एक वडा एक खेल मैदानसमेत बनेको छ ।

विद्यालय र अस्पतालका लागि आवश्यक जनशक्ति व्यवस्था गरिएको छ । कृषिमा अनुदान र दूध बेच्ने किसानलाई गाउँपालिकाले अनुदानसमेत दिने भएको छ । स्मार्ट पालिका बनाउनका लागि विद्युतीय हाजिरीको व्यवस्था गरिएको पालिकाका सूचना अधिकारी मनोज दङ्गालले बताए।

गाउँपालिकाको सडक र वडा नं १०को सडक कालोपत्रे गरिएको छ । त्यस्तै गाउँपालिका वरिपरिको एक किलोमिटर सडकसमेत कालोपत्रे गर्न लागिएको इन्जिनियर घोरासैनीले जानकारी दिए। रासस