हराएका किशोरीको खोजी गर्दा सात जनाकाे शव भेटियाे
हेन्रीएटा (ओक्लाहोमा)- ओक्लाहोमामा हराएका किशोरीको खोजीका क्रममा सात जनाकाे शव भेटिएकाे छ ।
ओक्लाहोमा शहरबाट एक सय ४५ किलोमिटर पूर्वमा अवस्थित हेन्रीएटा शहरमा गरिएको खोजतलासका क्रममा सात जनाको शव भेटिएको अनुसन्धान अधिकारीहरूले बताएका छन् ।
ओक्लाहोमा राज्यको अनुसन्धान कार्यालयका प्रवक्ता जेराल्ड डेभिडसनले चिकित्सा परीक्षणबाट मृतको परिचय खुल्ने बताउँदै हराएका किशोरी पनि ती मृतकको समूहमा भए/नभएको जानकारी परीक्षणपछि मात्र ज्ञात हुने जनाएका छन् । मृतकहरूको परिचय सार्वजनिक गरिएको छैन ।
चौध वर्षीया आइबी वेबस्टर र १६ वर्षकी ब्रिटनी ब्रुवर हराएकाले उनीहरूको खोजबिनका लागि सोमबार जारी गरिएको ‘खोजीको सूचना’ सोमबार अपराह्न ओक्लाहोमा राज्यमार्ग गस्तीले रद्द गरेको छ । बेवस्टर र ब्रुवरलाई यौन अपराधमा कारागारबाट छुटेका जेसी म्याकफडेनसँग यात्रामा रहेको देखिएको थियो ।
बलात्कारमा दोषी उनी सन् २०२० को अक्टोबरमा रिहा भएका थिए । एपी
