रासायनिक मल उद्योग खोल्नेबारे अध्ययन गर्न अर्थमन्त्रीको संयोजकत्वमा समिति
काठमाडौं : सरकारले मुलुकमै रासायनिक मल उत्पादन गर्ने उद्योग स्थापना गर्न अध्ययन गर्न अर्थमन्त्री विष्णु पौडेलको संयोजकत्वमा ३ सदस्यीय समिति बनाएको छ । समितिको सदस्यमा उद्योग वाणिज्य तथा आपूर्तिमन्त्री लेखराज भट्ट र कृषि तथा पशुपंक्षी विकासमन्त्री घनश्याम भुसाल सदस्य रहेको सरकारका प्रवक्ता एंव सूचना तथा सञ्चार प्रविधि मन्त्री पार्वत गुरूङले जानकारी दिए ।
मन्त्रिपरिषद् बैठकले गरेका निर्णय सार्वजनिक गर्न बिहीबार आयोजित पत्रकार सम्मेलनमा प्रवक्ता गुरुङले निकट भविष्यमै रासायनिक मल उत्पादन गर्ने उद्योग स्थापना गर्ने र त्यसको अध्ययन गर्न समिति बनाइएको जानकारी दिए ।
मन्त्रिपरिषद् बैठकमा प्रधानमन्त्री केपी शर्मा ओलीले स्वदेशमै रासायनिक मल उत्पादन गर्ने उद्योग खोल्ने प्रस्ताव ल्याएका थिए । र प्रधानमन्त्रीको प्रस्ताव अनुरुप उद्योग स्थापना गर्ने निर्णय भएको गुरूङले बताए ।
नेपालमै सम्भव छ रासायनिक मल उत्पादन
गुरुङका अनुसार पौडेलको संयोजकत्वको समितिले उद्योग स्थापनाबारे निकट भविष्यमै कसरी लगानी गर्ने र कस्तो संरचना बनाउने भनेर सम्भाव्यता अध्ययन गर्नेछ । ‘नेपालमा कारखानाको सम्भाव्यता, लगानीको मोडल र कारखानासँग सम्बन्धित सबै विषयको अध्ययन गरेर समितिले प्रतिवेदन पेस गर्नेछ,’ प्रवक्ता गुरुङले भने, ‘सोही प्रतिवेदनका आधारमा मल कारखानाको प्रक्रिया तुरुन्तै थालिनेछ ।’
