जनकपुरधाम - माधवकुमार नेपाल नेतृत्वको नेकपा (एकीकृत समाजवादी)ले पनि प्रदेश २ सरकारमा जाने तयारी गरेको छ । केन्द्रमा भएको एकीकरण अनुसार जसपा नेतृत्वमा रहेको प्रदेश सरकारले कांग्रेस, माओवादीसँगै नेकपा एकीकृत समाजवादीलाई पनि सरकारमा सहभागी गराउन खोजेका थिए । तर दलको छिनोफानो नभएको कारण सहभागी हुन सकेको थिएन।

एकीकृत समाजवादी दल दर्ता भएपछि सरकारमा सहभागी गराउने तयारी थालिएको बताइएको छ । संघीय सरकारमा सहभागी भएलगतै प्रदेश २ मा सरकारमा सहभागी हुने एकीकृत समाजवादीका प्रदेश सांसद शत्रोध्न महतोले बताए ।

'अनौपचारिक रूपमा कुरा भइरहेको छ,' उनले भने, 'तर बुधबारसम्म प्रदेश सांसदको सनाखत भएपछि सरकारमा जाने विषयमा औपचारिक रूपमा मुख्यमन्त्रीसँग छलफल हुनेछ ।' बुधवार आफ्नो पार्टीको सनाखत हुँदैछ । सो कार्य सकेपछि संसदीय दलको नेता चयनलगायतका कुरा सम्पन्न गरेर सरकारमा सहभागी र कुन कुन मन्त्रालय दिने सम्बन्धमा कुरा हुने उनले बताए ।

अहिले प्रदेशमा जनता समाजवादी पार्टी (जसपा) को नेतृत्वको सरकारमा छ । सो सरकारमा नेपाली कांग्रेस र नेकपा माओवादी केन्द्रको सहभागिता रहेको छ । केन्द्रीय गठबन्धन अनुसार तत्कालीन राजपाबाट मन्त्री बनेका जितेन्द्र सोनललाई हटाएर कांग्रेसलाई सहभागी गराएको छ भने आफ्नै पार्टीका मन्त्री ज्ञानेन्द्र यादवलाई हटाएर माओवादीलाई सहभागी गराएका छन् ।

कांग्रेसबाट रामसरोजले भौतिक पुर्वाधार विकास मन्त्रीको जिम्मेवारी पाएका छन् भने माओवादीबाट भरत साहले आन्तरिक मामिला तथा सञ्चार मन्त्रीको जिम्मेवारी सम्हालेका छन् । कांग्रेसले ३ वटा र माओवादीले एउटा मन्त्रालय पाएका छन् । कांग्रेसले ३ वटा मध्ये एउटा भौतिक पुर्वाधार विकास मन्त्रालय र त्यसै मन्त्रालयलाई टुक्राएर खानेपानी तथा उर्जा मन्त्रालय ओमप्रकाश शर्मा र समाजिक विकास मन्त्रालयलाई टुक्रायाएर महिला तथा बालिका मन्त्रालय विरेन्द्र सिंहलाई जिम्मेवारी दिइएको छ ।

मुख्यमन्त्रीसहित ७ वटा मन्त्रालयलाई टुक्राएर ११ वटा मन्त्रालय बनाइएको छ । हाल ११ मन्त्रालयमध्ये दुई वटा रिक्त रहेको छ । ती दुवै मन्त्रालय नेकपा एकीकृत समाजवादीलाई दिने तयारी भइरहेको बुझिएको छ । हाल मुख्यमन्त्री राउतले सम्हाल्दै आएका वाणिज्य, आपूर्ति तथा विज्ञान प्रविधि र कानून, न्याय तथा प्रदेश सभा मामिला मन्त्रालय एकीकृत समाजवादीलाई दिइने मुख्यमन्त्री श्रोतले जनाएको छ ।