पत्रकार महासंघको साधारण सभा पहिलोपटक सुर्खेतमा हुँदै
सुर्खेत- नेपाल पत्रकार महासंघ केन्द्रीय कार्य समितिको साधारण सभा पहिलोपटक कर्णाली प्रदेशमा आयोजना हुँदैछ ।
महासंघको केन्द्रीय कार्यसमितिको आयोजना तथा सुर्खेत शाखाको आथित्यतामा पुस ८ र ९ गते साधारण सभा सुर्खेतको वीरेन्द्रनगरमा आयोजना गर्न लागिएको हो । कार्यक्रमका लागि विभिन्न समिति र उपसमितिहरू निर्माण गरी तयारीमा लागेको महासंघले जनाएको छ ।
साधारण सभाको तयारी अन्तिम चरणमा पुगेको महासंघले बताएको छ ।
अधिवेशनको उद्घाटन सत्रमा राष्ट्रपति विद्यादेवी भण्डारी, सञ्चार मन्त्री, अर्थमन्त्री, राष्ट्रिय दलका प्रमुख एवम् प्रतिनिधि, मुख्यमन्त्री, सुर्खेतस्थित स्थानीय तहका प्रमुखहरू र विभिन्न संघ संगठनका प्रमुखहरूको सहभागिता रहने जनाइएको छ । नेपाली कांग्रेसका उपसभापति पूर्णबहादुर खड्का, नेकपा एमालेका महासचिव शंकर पोखरेल, नेकपा माओवादी केन्द्रका केन्द्रीय सदस्य कृष्णबहादुर महरा लगायतको उपस्थिति हुनेछ ।
साधारण सभाको उद्घाटन सत्र पुस ८ गते विहान ९ बजे हुने छ भने त्यसअघि विहान ८ बजे वीरेन्द्रनगरको मंगलबढी चोकबाट प्रभातफेरी कार्यक्रम गरिने भएको छ ।
साधारण सभाबाटै महासंघको आगामी भावी कार्ययोजना निर्माण समेत गरिने महासंघका केन्द्रीय महासचिव रोशन पुरीले जानकारी दिए । महासचिवले पेस गरेको महासंघको सांगठनिक नीतिगत प्रतिवेदन, कोषाध्यक्षले पेस गर्ने आर्थिक प्रतिवेदन र लेखा समिति संयोजकको प्रतिवेदनमाथि बृहत् छलफल समेत हुने जनाइएको छ ।
एक हजार तीन सय १६ साधारण सदस्य रहेकोमा यस अधिवेशनमा महासंघका ७७ जिल्ला शाखा, ३९ प्रतिष्ठान शाखा, १२ एशोसिएट शाखा, १० वैदेशिक शाखा र दुई आवासीय शाखा (नेजा र एन्जा) का पदाधिकारी सदस्य गरी सात सय ५० राष्ट्रिय परिषद सदस्यको सहभागिता हुने महासचिव पुरीले जनाए ।
अधिवेशनका लागि आर्थिक दायित्व केन्द्रीय समितिले लिएको छ । महासंघले अधिवेशन सफल पार्नका लागि तीन तहका सरकारसँग आर्थिक सहयोगका लागि समेत अनुरोध गरेको महासंघका कोषाध्यक्ष कलेन्द्र सेजुवालले जानकारी दिए । संघीय सरकारले महासंघको अधिवेशनका लागि वार्षिक बजेट विनियोजन गर्दै आएको छ ।
सोही बमोजिम यसपटक हुने अधिवेशनका लागि पनि बजेट व्यवस्थापन हुने अपेक्षा गरिएको छ भने कर्णाली प्रदेश सरकारले अधिवेशनकै लागि १५ लाख बजेट व्यवस्थापन गरिदिएको कोषाध्यक्ष सेजुवालले बताए ।
स्थानीय सरकारको समेत दायित्व बोध हुने भएकोले सुर्खेतस्थित स्थानीय तहसँग आर्थिक सहयोगका लागि अनुरोध गरेको उनले बताए ।
