काठमाडौँ- थ्रीस्टार क्लबले सहिद स्मारक ए डिभिजन लिगमा दोस्रो जित हात पारेको छ । शनिबार दशरथ रंगशालामा भएको खेलमा थ्रीस्टारले जवालाखेल युथ क्लबलाई २–१ ले पराजित गर्‍यो । जारी लिगमा दोस्रो जित दर्ता गर्न थ्रीस्टारले सातौँ चरणसम्म पर्खनु पर्‍यो । आफ्नो पहिलो खेलमा थ्रीस्टारले च्यासल युथ क्लबलाई पराजित गरेको थियो । 

यसपालिको लिगमा नाम अनुसारको प्रदर्शन गर्न नसकिरहेको भनेर आरोप खेपिरहेको थ्रीस्टारलाई जित दिलाउन आयुष घलान र रितिक कुमार खड्काले एक–एक गोल गरे । पहिलो हाफमै दुई गोल गरेको थ्रीस्टारले दोस्रो हाफमा गोल थप्न सकेन । बरु जावलाखेलले एक गोल फर्कायो । उसका लागि भारतीय खेलाडी निकोलस फर्नान्डेजले गोल गरे । 

जितसँगै थ्रीस्टार पाचौँ स्थानमा उक्लेको छ । उसको खातामा सात खेलबाट १० अंक जम्मा भएको छ । पराजित जावलाखेल भने सात खेलबाट सात अंक बटुलेर नवौँ स्थानमा छ ।