१४ वर्षीय किशोरको ‘अद्भुत इन्द्रेनी’ खण्डकाव्य
धनगढी : धनगढी उपहानगरपालिका–३ का १४ वर्षीय किशोर विभूति अधिकारीको ‘अद्भुत इन्द्रेनी’ खण्डकाव्य लोकार्पण गरिएको छ । मंगलबार बिहान धनगढीमा नेपाल प्रज्ञा प्रतिष्ठानका प्राज्ञ डा. देवी नेपालले ‘अद्भुत इन्द्रेनी’ को लोकार्पण गरेका हुन् ।
१४ वर्षीय कविले अत्यन्त बौद्धिक एवं सूचनामूलक खण्डकाव्यको जन्म दिएको डा. नेपालले बताए । उनले भने, ‘नेपाली भूगोल, प्रकृति, संस्कृति, समाज र जीवनपद्धतीमा पाइने अद्भुत प्रकारको सप्तरङ्गी यस खण्डकाव्यले गहिराइमा पुगेर उतारेको छ ।’
धनगढीकै सिद्धार्थ शिशु सदनमा कक्षा ९ मा अध्ययनरत विभूतिले शास्त्रीय छन्द विधामा खण्डकाव्य तयार पारेको बताए । उनले भने, ‘अद्भुत इन्द्रेनी खण्डकाव्यमा तीन सय ४७ श्लोकमा विशाल नेपालको भूगोल, नेपाली समाज र संस्कृतिलाई उतार्ने प्रयास गरेको छु ।’
‘अद्भुत इन्द्रनी’ मा अधिकारीले शार्दूलविक्रीडित, अनुष्टुप, मधुमाधवी, शिखरणी र स्रग्धारा गरि पाँच शास्त्रीय छन्दको प्रयोग गरेका छन् । अधिकारीको २०६३ साउन ५ गते सुदूर पूर्व इलाममा जन्म भएको थियो ।
