युरो कप छनोटः हालान्डले दुई गोल गर्दा नर्वेको जित
असार ६, २०८०
काठमाडौँ- युरो कप छनोटअन्तर्गत अर्लिङ हालान्डको दुई गोलको मदतमा नर्वेले साइप्रसमाथि जित हात पारेको छ । मंगलबार राति भएको समूह ‘ए’ अन्तर्गतको खेलमा नर्वेले साइप्रसलाई ३-१ ले पराजित गरेको हो ।
नर्वेको जितमा हालान्डले दुई गोल गर्दा ओला सोल्बाकेनले एक गोल गरे । साइप्रसका लागि ग्रिगोरिस कास्टानोसले एक गोल फर्काए ।
युरो कप छनोटअन्तर्गत चार खेलमा नर्वेको यो पहिलो जित हो । यसअघि उसले स्पेनसँग ३-० तथा स्कटल्यान्डसँग २-१ ले पराजित हुँदा जर्जियासँग १-१ को बराबरी खेलेको थियो ।
सन् २००० को युरो कपमा छनोट भएयता नर्वेले मुख्य प्रतियोगिताका लागि छनोट हुन सकेको छैन ।
