काठमाडौँ - इन्टरनेट सेवा प्रदायक महासंघले पोखरा आसपासका क्षेत्रमा इन्टरनेट बन्द हुनसक्ने चेतावनी दिएको छ ।  नेपाल विद्युत प्राधिकरणले पोखरमा रहेको इन्टरनेट सेवाको मुख्य अपरेसन सेन्टरमा विद्युत कटौती गरेको भन्दै महासंघले चेतावनी दिएको हो । 

हाल पोखरामा इन्टरनेट सेवा प्रदायकहरूको मुख्य अपर्सन सेन्टरमा विद्युत प्राधिकरणले छानेरै विद्युत विच्छेद गरेको  भन्दै महांसघले विज्ञप्ति जारी गरेको छ।

सेवा प्रदायकहरूले विद्युत महसुल नियमित रुपमा भुक्तानी गर्दागर्दै पनि विद्युत आपूर्तिका कारण सेवा बन्द हुने अवस्थामा पुगेको जनाएको छ। विज्ञप्तिमा भनिएको छ 'हामी सेवा प्रदायकहरूले हरसम्भव प्रयास गर्दा पनि अपरेसन सुचारु गर्न नसक्ने अवस्था आएकोले कुनै पनि समयमा पोखरा तथा पोखरा आसपासका क्षेत्रहरूमा इन्टरनेट सेवा अवरुद्ध हुन सक्ने यसै प्रेस विज्ञप्ति मार्फत जानकारी गराउँछौँ। यसको सम्पूर्ण जिम्मेवारी नेपाल विद्युत प्राधिकरणले लिई क्षतिपूर्ति समेत दिनुपर्दछ।'

'हामीले प्रधानमन्त्री कार्यालय, गृह मन्त्रालय, सञ्चार तथा सूचना प्रविधि मन्त्रालय, उर्जा, जलश्रोत तथा सिँचाइ मन्त्रालय, नेपाल दूरसञ्चार प्राधिकरण, मानव अधिकार आयोग, उपभोक्ता मञ्च र राज्यका जिम्मेवार निकाय समक्ष सत्य तथ्य प्रस्तुत गरी हस्तक्षेपकारी भूमिका निर्वाह गर्न हार्दिक अपिल गर्दा पनि स्थितिमा कुनै सुधार नआएको कुरा विनम्र अनुरोध गर्दछौँ।'