महोत्तरी- नेकपा माओवादी केन्द्र महोत्तरीको वडा तथा नगर सम्मेलनमा आकांक्षीहरू धेरै भएपछि विवाद चर्किएको छ । उम्मेदवारहरूको आ-आफ्ना दाबी र अडानका कारण सम्मेलन नै अन्योलमा परेको छ छ ।

नेकपा माओवादी केन्द्र महोत्तरीका अनुसार एक सय ३७ वडामध्ये एक सय ३० वडामा सम्मेलन सकिएको छ भने बाँकी सात वडामा विवाद कायम नै छ  ।  केही पालिकाहरूमा विवाद कै कारण सम्मेलनको बन्दसत्र स्थगित भएका छन् ।

जिल्लाका १५ पालिकामध्ये अहिलेसम्म नौ पालिकामा सफलतापूर्वक सम्मेलन समपन्न भएको माओवादी केन्द्रले दाबी गरे पनि आन्तरिक कलह उत्कर्षमा छ । बर्दिबास नगरपालिकामा १७ मंसिरमा हुने भनिएको अधिवेशन आकांक्षीहरू विवादका कारण स्थगित भएको छ । 

महोत्तरीमा विवाद कै कारण माओवादीका शीर्ष नेताहरू पालिकाका उद्घाटन र बन्दसत्रमा सहभागी बनेका छन् । पुर्व शिक्षा, विज्ञान तथा प्रविधि मन्त्री गिरिराजमणि पोखरेल र पूर्व उपप्रधानमन्त्री नारायणकाजी श्रेष्ठ अहिले महोत्तरीमै छन् ।

रागोपालपुर नगरपालिका र भंगाहा नगरपालिकामा असहमतिका बीचमा पदाधिकारी मनोनीत गरेको स्थानीय नेताको आरोप छ । सम्मेलनमा माओवादी केन्द्र महोत्तरीका इन्चार्ज राजु खड्का र संसद गिरिराजमणि पक्ष गरी दुई वटा प्यानल बनेको छ ।

दुवै नेता आ-आफ्नै उम्मेदवार चयन गर्न लागिपरेका छन् । खड्का र पोखरेलबीच देखिएको अडानले  सर्वसम्मत हुन भने निक्कै अप्ठ्यारो बनिरहेको एक नेताले बताए ।

यता, कतिपय वडाका सम्मेलन अझै निश्चित हुन सकेको छैन् । पुसमा हुने भनिएको माओवादी केन्द्रको राष्ट्रिय सम्मेलनमा वडा सम्मेलन अन्यौलमा पर्दा प्रतिनिधि छनोटमा समेत अफ्ठ्यारो स्थिति सिर्जना भइरहेको छ ।

माओवादी केन्द्रको नगरपालिकाका लागि ६५ सदस्य र गाउँपालिकाका लागि ५५ सदस्य चयन गर्नुपर्ने प्रावधान छ । तर, सम्मेलन भैइसकेका कतिपय पालिकामा विवाद कै कारण कतिपय पदहरू रिक्त छन् ।

गौशाला नगरपालिकामा अझै दुई पद खाली राखेर सम्मेलन सम्पन्न गरेको माओवादी केन्द्र महोत्तरीका इन्चार्ज राजु खड्काले जानकारी दिए । बर्दिबास नगरपालिकाको स्थगित बन्दसत्र २२ मंसिरलाई निर्धारण गरिएको छ । सकेसम्म सर्वसम्मत गर्ने नत्र निर्वाचन प्रक्रियामा गएर भए पनि २२ मंसिरमा बर्दिबासको अधिवेशन समपन्न गर्ने माओवादी केन्द्रको तयारी छ ।