काठमाडौँ- प्रथम जननिर्वाचित प्रधानमन्त्री, नेपाली कांग्रेसका संस्थापक नेता, साहित्यकार तथा चिन्तक बीपी कोइरालाका गैरसाहित्यिक सामग्री समेट्दै ‘विश्वेश्वरप्रसाद कोइराला : आधारभूत संकलन’ पुस्तक प्रकाशन भएको छ ।

लेखक प्रदीप गिरिको सम्पादनमा प्रकाशित पुस्तकमा बीपी कोइरालाका विभिन्न समयका मन्तव्यदेखि बीपीलाई लेखिएका र बीपीले लेखेका चिठीपत्र संकलन गरिएको छ । पुस्तकका सम्पादक गिरिको भनाइ छ, ‘बीपीका सम्बन्धमा धेरैले धेरै थरी पुस्तक प्रकाशन गर्नुभएको छ । यसमा हामीले पाठकको सजिलोका लागि सकेसम्म धेरैजसो प्रतिनिधि गैरसाहित्यिक सामग्री समेटेका छौँ ।’

बीपीका समग्र गैरसाहित्यिक रचनावली प्रकाशनको शृङ्खलाका रूपमा प्रारम्भिक कामका रुपमा यो पुस्तक निकालिएको प्रकाशक फिनिक्स बुक्सले जनाएको छ । 
पुस्तकमा एक सय भन्दा बढी लेख तथा दुई दर्जन जति परिशिष्ट खण्ड छन्, जसमा बीपीको अदालती बयानदेखि अन्य दस्तावेज समेटिएको छ ।