ओ ! आगोको प्रथम प्रयोगकर्ता नियान्डरथल, 
कुन अभिप्रेरणाले तिमीले आगो पत्ता लगायौ ? 
र,
सभ्यताको आदिम इतिहासलाई सुनौलो भविष्यतिर डोर्‍यायौ ? 
तिमीले आगो पत्ता नलगाएको भए, 
के वैदिक स्रष्टाहरूले आगो पार्ने मन्त्र लेख्थे र ?
के आर्यहरूले अग्न्यास्त्र कल्पन्थे र ?
के पश्चिमी  मिथकमा आगो चोर्ने देवता जन्मन्थे र ? 
के बालकृष्ण समजीले आगो र पानी खण्डकाव्य लेख्थे र ?
आइन्स्टाइनको इ=एमसी स्क्वायरको सिद्धान्तमा पनि आगोकै बीजरूप देखिन्छ नि

यसकारण ! आगोको आरनमा तिमी,
सभ्यताको महानायक हौ,
सभ्यताको शिलखानामा तिमी,
अग्नि गायक हौ,
त्यसैले त सभ्यताको अग्निवेदीमा,
तिमीलाई सम्झिरहेको छु,
त्रासद हिमयुगको अन्त्यपछि, 
क्याम्प फायर गरिरहेको छु,
ठकठक ठकठक ठोक्किँदा पाषाण औजार !
आगोका  झिल्काहरू झल्कियो र त ! 

तिम्रो आदिम चेतना आगोसँग खेल्न सक्यो ! 
हे अग्निपूजक नियान्डरथल !
हे अग्नि सर्जक नियान्डरथल ! 

आगोको यज्ञवेदीमा म 
अग्निमिडे पुरोहितम्को राग अलापिरहेको छु !!
अग्निमिडे पुरोहितम् को राग अलापिरहेको छु !!
तिमीले पत्ता लगाएको आगो,
मृत्यु बनेर बज्रियो जापानको नागासाकि र हिरोसिमामा,
इराक र युक्रेनमा,
आज पनि
अमेरिका र रुसको अणुभट्टीमा
आगो उत्पादन हुँदै छ महाकाल समान,
र
अहंकारको अग्नियुद्धमा आगो सभ्यता नासिँदै गर्दा,
म भने विश्वशान्तिको कामना गर्दैछु,
नियान्डरथललाई सम्झेर

ॐ अग्नाय स्वाहाको आलापमा,
अग्निमिडे पुरोहितम्को आलापमा
नियान्डरथल गुन्जिन्छ महान् आविष्कारक बनेर
किनभने नियान्डरथलको आगो विनाशका लागि थिएन,
सिर्जनाको लागि थियो 
नियान्डरथलको आगो सभ्यता
नियान्डरथलको आगो सभ्यता !!