काठमाडौँ- स्वतन्त्र ऊर्जा उत्पादकहरूको संस्था (इप्पान)ले ‘विद्युत् खरिद बिक्री सम्झौता गर्ने सम्बन्धमा नीतिगत व्यवस्था सम्बन्धी प्रतिवेदन, २०८०’ को स्वागत गरेको छ । इप्पानले काठमाडौँमा आइतबार पत्रकार सम्मेलन गर्दै प्रतिवेदनमा विद्युत् आयोजनाहरूको विद्यमान अवस्था, विद्युत् उत्पादनको अवस्था, विद्युत् प्रशारणको अवस्था, समितिले कार्यदेश अनुसार गरेको अध्ययन तथा विश्लेषणका विषय वस्तुहरूको स्वागत गरेको हो ।

नेपाल विद्युत् प्राधिकरण सञ्चालक समितिको २०७९ माघ २६ गते बसेको बैठकले विद्युत् खरिद बिक्री सम्झौता गर्ने सम्बन्धमा नीतिगत रूपमा फेरबदल गर्नुपर्ने आवश्यकता महसुस गरी प्रतिवेदन तयार गर्न ऊर्जा जलस्रोत तथा सिँचाइ मन्त्रालयका सहसचिव सन्दीपकुमार देवको संयोजकत्वमा पाँच सदस्यीय समिति गठन भएको थियो । समितिले तयार पारेको प्रतिवेदन नेपाल विद्युत् प्राधिकरण सञ्चालक समिति समक्ष पेस भइसकेको छ ।

पत्रकार सम्मेलनमा इप्पानका वरिष्ठ उपाध्यक्ष मोहनकुमार डाँगीले पीपीए गर्दा क्यु ४० पिओईमा गर्दै आएकोमा आयोजना अप्टीमाइज हुने पिओईकै आधारमा पिपिए गर्ने तथा उत्पादन सम्मिश्रणमा उल्लिखित सीमाभन्दा ३५ प्रतिशत बढी क्षमतामा आरओआर, पिआरओआर र स्टोरेज/पम्प्ड स्टोरेज आयोजनाहरूको विद्युत् खरिद बिक्री गर्ने कुरा स्वागतयोग्य भएको बताए ।

उनले पिआरओआरका लागि न्यूनतम दुई घण्टा पिकिङ पाउण्डेज भए हुने, सुख्खा यामका महिनाको ३० प्रतिशत ऊर्जा पुग्नुपर्ने व्यवस्था हटाई वर्षायाम र सुख्खायामको अवधिमा ६/६ महिना कायम गर्ने कुराले पिआरओआर आयोजना विकास गर्न निकै सरल र सहज बनाउने बताए । डाँगीले इप्पानले लामो समयदेखि राख्दै आएको मागलाई कार्यदलले सम्बोधन गरेको भन्दै क्यु ४० मा डिजाइन गर्दै आएको प्रोजेक्टलाई यो प्रतिवेदनले क्यु २५ मा डिजाइन गर्दा हुने बनाएको भन्दै प्रतिवेदन स्वागतयोग्य रहेको बताए ।  

स्वतन्त्र ऊर्जा उत्पादकहरूले कुनै कोरिडोरमा प्रशारण लाइनको क्षमता बाँकी भई विद्युत् प्रशारण हुने अवस्था रहेमा त्यस क्षेत्रमा रहेका आयोजनाहरूको पिपिए गरिदिन सुझाव दिएका छन् ।