लाइन मुक्त देश हाम्रो संकल्प हो : प्रधानमन्त्री प्रचण्ड
काठमाडौँ–प्रधानमन्त्री पुष्पकमल दाहाल ‘प्रचण्ड’ले लाइनमुक्त देश आफू नेतृत्वको सरकारको संकल्प भएको बताएका छन् । मंगलबार प्रधानमन्त्रीको रुपमा विश्वासको मत माग्दै उनले सरकारी कार्यालयमा अब नागरिकले लाइन बस्नुनपर्ने वातावरण मिलाउने बताएका हुन् ।
‘राहदानी लिन बिहान दुई बजेदेखि लाइन बस्नु परेपछि नागरिकले कसरी राज्यमाथि विश्वास गर्छन्,’ उनले भने, ‘अहिलेकै गतिमा काम हुने हो भने कति समयमा तीन करोड नेपालीले परिचय पत्र पाउँछन् । सवारी साधनको लाइसेन्स लिन कति समय लाग्ने हो ? सरकारी अस्पतालमा नाम दर्ता गर्नै किन यत्रो लाइन ? मैले सचिवज्यूहरुलाई भनिसकेको छु । नीतिगत समस्या समाधानको जिम्मा म लिन्छु । बाँकी तपाईहरुले लिनुपर्छ भनेको छु । लाइनमुक्त देश हाम्रो संकल्प हो ।’
देशका हरेक नागरिकलाई यो सरकार मेरो अभिभावक भन्ने बनाउने पनि उनले बताए । ‘देशका हरेक नागरिकलाई लागोस् यो सरकार मेरो अभिभावक हो,’ उनले भने, ‘सरकार मेरो पक्षमा छ ।’
