जनकपुरधाम : कोभिड-१९ संक्रमण बढदै गएको दृष्टिगत गर्दै मालपोत कार्यालय धनुषा र नापी कार्यालयले आइतबारदेखि आफ्ना सम्पूर्ण सेवा अनिश्चितकालका लागि बन्द गरेका छन् । कोभिड संक्रमणको दोस्रो भेरियन्ट तिब्र रुपमा फैलिन थालेपछि जनकपुरधामस्थित भूमिसुधार तथा मालपोत र नापी कार्यालयले अर्को सूचना जारी नभएसम्मका लागि मुद्दा बाहेकका सबै सेवा बन्द गर्ने निर्णय गरेका हुन् । 

कोभिडको दोस्रो चरणमा धेरै मानिसहरू प्रभावित भइरहेको र यस जिल्लामा पनि प्रभावितको संख्या बढ्दै गइरहेकोले जोखिम नियन्त्रण गर्न, भिडभाड कम गरी कार्यालय सञ्चालन गर्ने व्यवस्था मिलाउँदासमेत भीड बढेकाले कार्यालयका कामहरू बन्द गरिएको बासु प्रसाद कोइरालाद्वारा जारी सूचनामा उल्लेख छ ।

त्यसैगरी आइतबारदेखि नापी कार्यालय धनुषालेसमेत आफ्नो सेवा बन्द गर्ने निर्णय गरेको छ । अर्को सूचना जारी नभएसम्मका लागि आइतबारदेखि सम्पूर्ण सेवा स्थगित गर्ने निर्णय गरिएको नापी अधिकृत विन्देश्वर यादवद्वारा जारी सूचनामा भनिएको छ ।